नेपाळमध्ये आलेल्या भीषण नैसर्गिक आपत्तीच्या बातम्या धडकताच संगमनेरसह अहिल्यानगर आणि नाशिक जिल्ह्यातील अनेक कुटुंबांची धडधड वाढली होती. संगमनेरच्या घुलेवाडी येथील निर्मला गुंजाळ यांच्या ट्रॅव्हल्स कंपनीमार्फत २४ ऑगस्टला नेपाळला गेलेले ४५ पर्यटक या प्रलयात अडकल्याची भीती निर्माण झाली होती. मात्र, सुदैवाने सर्व पर्यटक पूर्णपणे सुखरूप असून ते आता परतीच्या प्रवासाला लागले आहेत. संगमनेरचे तहसीलदार धीरज मांजरे यांनीही प्रशासनाचा पर्यटकांशी संपर्क झाला असून ते सुरक्षित असल्याची अधिकृत माहिती दिली आहे.
२६ ऑगस्टच्या दुपारनंतर नेपाळमध्ये महाप्रलयाने थैमान घातल्याच्या बातम्या वाहिन्यांवर झळकताच पर्यटकांच्या नातेवाईकांमध्ये प्रचंड खळबळ उडाली. संगमनेरमधील निवृत्त शिक्षक हिरालाल पगडाल यांच्यासह अनेक भाविकांचे नातेवाईक चिंतेत पडले आणि त्यांनी तातडीने संपर्क साधण्याचा प्रयत्न सुरू केला. नेटवर्कच्या समस्येमुळे सुरुवातीला काही फोन न लागल्याने भीतीचे सावट अधिक गढूळ झाले होते. अखेर, सहल आयोजक निर्मला गुंजाळ यांच्याशी संपर्क झाला आणि सर्व पर्यटक पोखरा या सुरक्षित व उंच ठिकाणी असल्याने निसर्गाच्या या कोपातून बचावल्याचे स्पष्ट झाले.
जीव वाचला असला तरी पर्यटकांसमोर सध्या राहण्या-खाण्याचे आणि आर्थिक व्यवहारांचे मोठे संकट उभे राहिले आहे. आगाऊ बुकिंग केलेली अनेक हॉटेल्स पुराच्या पाण्यात नष्ट झाली, तर काहींनी सुविधा देण्यास असमर्थता दर्शवत आरक्षण रद्द केले. उपलब्ध हॉटेल्सचे दर गगनाला भिडले असून इंटरनेट सेवा ठप्प असल्याने ऑनलाइन पैसे भरणे कठीण झाले आहे. या प्रतिकूल परिस्थितीतही गुंजाळ आणि त्यांचे सहकारी पर्यटकांची सोय करण्यासाठी शर्थीचे प्रयत्न करत आहेत.
प्रशासकीय पातळीवरून मिळालेल्या माहितीनुसार, नेपाळमधील रस्ते आणि प्रवासावरील निर्बंध विचारात घेऊन नियोजनात बदल करण्यात आला आहे. सर्व पर्यटक शुक्रवारी रात्री लुंबिनी येथे मुक्काम करतील आणि शनिवारी सकाळी भारताच्या दिशेने रवाना होतील. निसर्गाच्या महाभयंकर तांडवातून सहीसलामत सुटल्याचा आनंद आणि लवकरच मायदेशी पोहोचण्याचा विश्वास घेऊन हे सर्व ४५ नागरिक आता सुटकेचा निःश्वास टाकत आहेत.
