भंडारदरा धरणातून खरीप पिकांसाठी सोमवारपासून पाणी सुटणार; गणेशोत्सवात दिलासा : आमदार खताळ

Annant Ppangarkar

महाराष्ट्र संवाद न्यूज ऑनलाईन-

कमी पावसामुळे संकटात सापडलेली खरीप पिके आणि आगामी गणेशोत्सवाची गरज विचारात घेऊन भंडारदरा धरणातून सोमवारपासून (१४ सप्टेंबर) पाण्याचे आवर्तन सोडण्याचा निर्णय जलसंपदा विभागाने घेतला आहे. राज्याचे जलसंपदा मंत्री राधाकृष्ण विखे पाटील यांनी दिलेल्या निर्देशांमुळे संगमनेर तालुक्यासह लाभक्षेत्रातील शेतकऱ्यांना व गणेशभक्तांना मोठा दिलासा मिळाला आहे, अशी माहिती आमदार अमोल खताळ यांनी दिली.

यंदा तालुक्यात अपेक्षित पाऊस न झाल्याने शेती पिके सुकू लागली असून, ग्रामीण भागात पिण्याच्या पाण्याची टंचाई निर्माण झाली होती. तसेच गणेश विसर्जन आणि उत्सवाच्या दिवसांत पाण्याची उपलब्धता व्हावी, अशी मागणी शेतकरी व गणेश मंडळाच्या कार्यकर्त्यांनी आमदार खताळ यांच्याकडे केली होती. या पार्श्वभूमीवर आमदार खताळ यांनी लोणी येथील बैठकीत आणि त्यानंतर जिल्हाधिकारी कार्यालयात पार पडलेल्या टंचाई आढावा बैठकीत जलसंपदा मंत्री विखे पाटील यांच्याकडे तात्काळ आवर्तन सोडण्याची आग्रही मागणी लावून धरली.

या मागणीची गांभीर्याने दखल घेत मंत्री विखे पाटील यांनी सोमवारपासून आवर्तन सुरू करण्याचे निर्देश दिले. पाणी सुटणार असल्याने सुकत चाललेल्या खरीप पिकांना नवसंजीवनी मिळणार असून विसर्जन सुलभ होण्यास मदत होणार आहे. शेतकऱ्यांच्या आणि नागरिकांच्या अडचणी दूर करणाऱ्या या निर्णयाबद्दल आमदार अमोल खताळ यांनी विखे पाटील यांचे आभार मानले आहेत.