दूषित पाणीपुरवठ्यामुळे राजापूरकरांचे आरोग्य धोक्यात; ग्रामपंचायतीच्या कारभारावर नागरिकांचा तीव्र संताप

महाराष्ट्र संवाद न्यूज ऑनलाईन-

राजापूर ग्रामपंचायत हद्दीत नागरिकांना पुरवठा करण्यात येत असलेल्या पिण्याच्या पाण्याबाबत अत्यंत गंभीर तक्रारी समोर आल्याने परिसरात खळबळ उडाली आहे. थेट पिण्याच्या पाण्यातच जीवजंतू आढळत असल्याचा खळबळजनक प्रकार उघडकीस आला असून, त्यामुळे ग्रामस्थांच्या आरोग्याचा प्रश्न ऐरणीवर आला आहे. प्रशासनाच्या या अस्वच्छ आणि बेजबाबदार कारभारामुळे साथीचे आजार पसरण्याची भीती व्यक्त केली जात आहे.

या गंभीर परिस्थितीची दखल घेऊन प्रशासक आदित्य सदगीर आणि ग्रामसेवक भाऊसाहेब भांड यांनी तात्काळ या समस्येकडे वैयक्तिक लक्ष देऊन उपाययोजना कराव्यात, अशी जोरदार मागणी ग्रामस्थांकडून केली जात आहे. पाण्याच्या या दुरवस्थेमुळे नागरिकांमध्ये तीव्र संतापाची लाट पसरली आहे.

ग्रामस्थांनी प्रशासनासमोर काही प्रमुख मागण्या मांडल्या आहेत. पाणीपुरवठा करणाऱ्या स्त्रोतांची आणि संपूर्ण यंत्रणेची तात्काळ प्रयोगशाळेत शास्त्रीय तपासणी करण्यात यावी, तसेच संपूर्ण पाणीपुरवठा यंत्रणेची स्वच्छता आणि निर्जंतुकीकरण मोहीम हाती घेण्यात यावी. पाण्याचा अधिकृत तपासणी अहवाल सर्वसामान्य नागरिकांसमोर पारदर्शकपणे जाहीर करावा, तसेच तोपर्यंत दूषित पाणीपुरवठा बंद करून तात्काळ शुद्ध आणि सुरक्षित पाण्याची पर्यायी सोय उपलब्ध करून द्यावी.

नागरिकांच्या आरोग्याशी होणारा हा खेळ तात्काळ थांबवून राजापूरवासियांना स्वच्छ, शुद्ध आणि सुरक्षित पाणी पुरवलेच पाहिजे, असा पवित्रा स्थानिक रहिवाशांनी घेतला आहे.