संगमनेरात २८ सप्टेंबरला बालकुमार साहित्य संमेलन; शंभराव्या अखिल भारतीय मराठी साहित्य संमेलनाची नांदी – दुर्गाताई तांबे

महाराष्ट्र संवाद न्यूज ऑनलाईन –

मातृभाषेविषयी निष्ठा वृद्धिंगत करणे, वाचन संस्कृतीला चालना देणे आणि विद्यार्थी व पालकांमध्ये साहित्याविषयी सजगता निर्माण करण्याच्या उद्देशाने संगमनेरमध्ये सोमवारी (२८ सप्टेंबर) एकदिवसीय बालकुमार साहित्य संमेलनाचे भव्य आयोजन करण्यात आले आहे. आगामी शंभराव्या अखिल भारतीय मराठी साहित्य संमेलनाची ही एक प्रकारे नांदीच ठरणार असल्याची माहिती स्वागताध्यक्ष, माजी नगराध्यक्ष दुर्गाताई तांबे यांनी दिली.

महाराष्ट्र साहित्य परिषद (पुणे), अखिल भारतीय मराठी बालकुमार साहित्य संस्था (शाखा संगमनेर), समर्थ युवा फाउंडेशन आणि मराठी भाषा संचालनालय यांच्या संयुक्त विद्यमाने या संमेलनाचे आयोजन करण्यात आले आहे. संमेलनाध्यक्ष म्हणून प्रसिद्ध वक्ते व साहित्यिक डॉ. संजय कळमकर तर उद्घाटक म्हणून ज्येष्ठ पत्रकार व साहित्यिक डॉ. स्वाती महाळंक उपस्थित राहणार आहेत. अकोले बायपासवरील मातोश्री लॉन्स येथे होणाऱ्या या कार्यक्रमास राज्याचे माजी मंत्री लोकनेते बाळासाहेब थोरात, महाराष्ट्र साहित्य परिषदेचे कार्यवाह प्रसाद मिरासदार, माजी आमदार डॉ. सुधीर तांबे, आमदार सत्यजित तांबे, महाराष्ट्र साहित्य परिषद शाखा संगमनेरचे कार्यवाह डॉ. नितीन संगमनेरकर आणि शारदा शिक्षण संस्थेच्या अध्यक्षा सुवर्णाताई मालपाणी यांची प्रमुख उपस्थिती लाभणार आहे.

या संमेलनात विविध ज्ञान, रंजन आणि प्रबोधनपर कार्यक्रमांची रेलचेल असणार आहे. यामध्ये संमेलनाध्यक्ष डॉ. संजय कळमकर यांचे प्रभावी व्याख्यान, श्रीमती संगीता पुंडगे यांचा मनोरंजनात्मक ‘बोलक्या बाहुल्या’ हा कार्यक्रम, तसेच प्रसिद्ध गायक त्यागराज खाडीलकर व दीपिका जोग यांचा ‘अक्षर गाणी’ हा प्रबोधनपर संगीत कार्यक्रम आयोजित करण्यात आला आहे. शालेय पाठ्यपुस्तकातील संगीतमय कवितांचे गायन प्रकाश पारखे व विद्यार्थी सादर करणार आहेत. कार्यक्रमाचे सूत्रसंचालन आणि निवेदन संदीप वाकचौरे करणार असून ध्वनी संयोजनाची जबाबदारी संतोष गोटस्कर सांभाळणार आहेत.

याशिवाय संमेलनात राष्ट्रीय पुस्तक न्यासाच्या (NBT) वतीने भव्य पुस्तक प्रदर्शन व विक्री केंद्र उभारण्यात येणार आहे. तसेच ज्येष्ठ अभिनेते, दिग्दर्शक व लेखक योगेश सोमण यांचा ‘ज्योती’ हा लघुपट आणि मराठी भाषा संचालनालयाचा माहितीपट देखील दाखविण्यात येणार आहे.

अखिल भारतीय मराठी बालकुमार साहित्य संस्था (शाखा संगमनेर) ही २०१० पासून साहित्य, संस्कार, संस्कृती आणि कला विषयक विविध उपक्रम राबवत असून, या उपक्रमांना संस्थेचे संस्थापक डॉ. संजय मालपाणी यांचे मोलाचे सहकार्य लाभत आहे. अध्यक्ष अनिल देशपांडे यांच्या सततच्या पाठपुराव्यामुळे संगमनेरला या संमेलनाचा बहुमान मिळाला आहे. आगामी २०२७ मध्ये पुणे येथे महाराष्ट्र साहित्य परिषदेचे १०० वे साहित्य संमेलन होणार असून, त्यानंतरचे १०१ वे अखिल भारतीय मराठी साहित्य संमेलन २०२८ मध्ये संगमनेर येथे व्हावे यासाठी विशेष प्रयत्न करणार असल्याचे दुर्गाताई तांबे यांनी यावेळी आवर्जून नमूद केले.

संमेलन यशस्वी करण्यासाठी अध्यक्ष अनिल देशपांडे, उपाध्यक्ष डॉ. विवेक वाकचौरे, कार्याध्यक्ष अरविंद गाडेकर, सचिव दर्शन जोशी, कोषाध्यक्ष अरुण टिळे, सहसचिव चारुदत्त काटकर तसेच सदस्य शशांक गंधे, प्रकाश पारखे, अनिल सोमणी आणि ओंकार बिहाणी परिश्रम घेत आहेत. या साहित्य संमेलनात संगमनेर शहर व ग्रामीण भागातील शाळांचे प्रतिनिधी आणि नागरिकांनी मोठ्या संख्येने उपस्थित राहून कार्यक्रमाचा लाभ घ्यावा, असे आवाहन आयोजकांच्यावतीने करण्यात आले आहे.