आश्वी परिसरात अवैध धंद्यांचा धुमाकूळ; पोलिसांच्या दुर्लक्षावर ग्रामस्थांचा संताप, कारवाईकडे लक्ष

महाराष्ट्र संवाद न्यूज ऑनलाईन –

संगमनेर तालुक्यातील आणि शिर्डी विधानसभा मतदारसंघातील प्रमुख केंद्र असलेल्या आश्वी व परिसरात अवैध धंद्यांनी पुन्हा एकदा डोके वर काढले असून उघडपणे सुरू असलेल्या बेकायदेशीर व्यवसायांमुळे स्थानिक नागरिक त्रस्त झाले आहेत. सध्या सर्वत्र गणेशोत्सव उत्साहात साजरा होत असताना शांतता व सुव्यवस्था राखण्याऐवजी परिसरात मटका, अवैध दारू, गुटखा विक्री आणि वाळू-मुरुमाची बेकायदेशीर वाहतूक जोरात सुरू आहे. स्थानिक पोलिसांच्या संशयास्पद दुर्लक्षामुळे या माफियांना नेमका कोणाचा पाठिंबा आहे, अशी चर्चा आता ग्रामस्थांमध्ये दबक्या आवाजात सुरू आहे.

परिसरातील चौकाचौकांत मटक्याचे अड्डे आणि बंदी असलेला गुटखा उघडपणे विकला जात असल्याने तरुण पिढी वाईट मार्गाला लागत आहे. तसेच महसूल व पर्यावरणाची हानी करत दिवस-रात्र वाळू व मुरुमाचे अवैध उत्खनन आणि वाहतूक सुरू आहे. आम्ही हप्ते देतो त्यामुळे आमचे कोणी काही बिघडवू शकत नाही, असा उघड दावा अवैध व्यावसायिक करत असल्याने नागरिकांमधून तीव्र संताप व्यक्त होत आहे. स्थानिक प्रशासनाच्या या मनमानी कारभारामुळे गुन्हेगारांचे धाडस अधिकच वाढले आहे.

जिल्हा पोलीस प्रमुखांनी संपूर्ण जिल्ह्यातून सर्व अवैध व्यवसायांचा पूर्णपणे बिमोड करण्याची घोषणा केली होती. मात्र आश्वी परिसरातील सद्यस्थिती पाहता वरिष्ठांच्या या आदेशाला स्थानिक पातळीवर केराची टोपली दाखवली जात असल्याचे स्पष्ट चित्र आहे. या बेकायदेशीर कारभारावर आळा घालून आश्वीतील शांतता टिकवण्यासाठी जिल्हा पोलीस प्रमुखांनी स्वतः लक्ष घालून स्थानिक पोलिसांवर कडक कारवाई करावी आणि या अवैध धंद्यांचा कायमचा नायनाट करावा, अशी जोरदार मागणी आता संपूर्ण तालुक्यातून केली जात आहे.