प्रवराकाठी ‘एकविरा’चे ४५० शिलेदार; डॉ. जयश्रीताई थोरात यांच्या नेतृत्वात गणेश विसर्जन अन् निर्माल्य संकलन अभियान यशस्वी

महाराष्ट्र संवाद न्यूज ऑनलाईन-

संगमनेर शहरात पर्यावरणपूरक गणेशोत्सव अत्यंत शांततेत आणि उत्साहात पार पडला. या पार्श्वभूमीवर कॅन्सरतज्ञ डॉ. जयश्रीताई थोरात यांच्या नेतृत्वात ‘एकविरा फाउंडेशन’च्या ४५० युवक-युवतींनी प्रवरा नदीकाठी व विविध विसर्जन स्थळांवर नागरिकांना मदत करत निर्माल्य संकलन आणि स्वच्छता मोहीम यशस्वीरीत्या राबवली. गेल्या सात वर्षांपासून अविरत सुरू असलेला हा सामाजिक उपक्रम यावर्षीही नागरिकांसाठी अत्यंत उपयुक्त ठरला.

गणेशोत्सवाच्या उत्तररंगात संगमनेर शहरातील मानाचे गणपती, विविध मंडळांचे बाप्पा आणि घरगुती गणेशमूर्तींचे सुरक्षित विसर्जन करण्यासाठी एकविरा फाउंडेशन व संगमनेर नगरपालिकेच्या संयुक्त विद्यमाने विशेष व्यवस्था करण्यात आली होती. या विसर्जन सोहळ्यात माजी मंत्री बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, दुर्गाताई तांबे आणि नगराध्यक्ष डॉ. मैथिलीताई तांबे यांनी प्रत्यक्ष उपस्थित राहून सहभाग नोंदवला.

प्रवरा नदीकाठी गंगामाई घाट, म्हाळुंगी नदीचा काठ आणि जाणता राजा मैदानावरील कृत्रिम तलाव अशा सर्वच ठिकाणी एकविराच्या कार्यकर्त्यांनी सेवा दिली. युवक-युवतींनी ५०-५० च्या गटांमध्ये उभं राहून येणाऱ्या भाविकांना पाण्याची खोली आणि सुरक्षिततेची माहिती दिली, तसेच निर्माल्य संकलनाचे आवाहन केले. विसर्जनानंतर नदीकाठी अस्वच्छता पसरून रोगराई वाढू नये, यासाठी या कार्यकर्त्यांनी परिसराची पूर्ण साफसफाई करत आरोग्याचा एक चांगला संदेश दिला.

प्रवरा नदीपात्रात पाण्याची खोली जास्त असल्याने संभाव्य अपघात टाळण्यासाठी सहकारमहर्षी भाऊसाहेब थोरात सहकारी साखर कारखान्याच्या वतीने विशेष कन्व्हेअरची (यांत्रिक व्यवस्था) सोय करण्यात आली होती. त्यामुळे गणेशमूर्तींचे विसर्जन अत्यंत सुरक्षित आणि सहजतेने पार पडले. याशिवाय नदीकाठी सुरक्षारक्षक, पोहणारे युवक आणि आरतीची चोख व्यवस्था एकविरा फाउंडेशन आणि संगमनेर पालिकेच्या सहकार्याने करण्यात आली होती.

माजी मंत्री बाळासाहेब थोरात यांनी एकविरा फाउंडेशनच्या सामाजिक बांधिलकीचे कौतुक केले. यावर्षी अल-निनोमुळे पावसाचे मोठे संकट निर्माण झाले असून दुष्काळी परिस्थिती पाहता पाण्याचा वापर काटकसरीने करण्याचे आवाहन त्यांनी केले. सरकारने तातडीने दुष्काळ जाहीर करून बळीराजाला आणि सर्वसामान्यांना दिलासा द्यावा, अशी मागणी करत त्यांनी राज्यात चांगल्या पावसासाठी प्रार्थना केली.

आमदार सत्यजित तांबे यांनी कारखान्याच्या यांत्रिकीकरणाच्या मदतीमुळे दुर्घटना टळल्याचे सांगत सेवाभावी युवकांचे आभार मानले. तर डॉ. जयश्रीताई थोरात यांनी स्पष्ट केले की, लोकनेते बाळासाहेब थोरात यांच्या प्रेरणेने एकविरा फाउंडेशन महिला सबलीकरणासोबतच पर्यावरण व आरोग्याशी संबंधित उपक्रमांत नेहमीच अग्रेसर राहिला आहे. निसर्गाचे रक्षण आणि परिसराची स्वच्छता राखत बाप्पाला भावपूर्ण निरोप देण्यासाठी संगमनेरकरांनी दिलेला प्रतिसाद कौतुकास्पद असल्याचे त्या म्हणाल्या.