महाराष्ट्राची सांस्कृतिक आणि वैचारिक परंपरा समृद्ध असणाऱ्या संगमनेर शहरात लवकरच अखिल भारतीय मराठी साहित्य संमेलन रंगण्याची शक्यता निर्माण झाली आहे. शंभरावे साहित्य संमेलन पुण्यात होत असून, पुढील १०१ वे अखिल भारतीय मराठी साहित्य संमेलन संगमनेरमध्ये आयोजित करण्यासाठी आपण विशेष प्रयत्न करणार आहोत, असा महत्त्वपूर्ण मानस संमेलनाच्या स्वागताध्यक्ष, संगमनेरच्या माजी नगराध्यक्ष दुर्गाताई तांबे यांनी व्यक्त केला.
महाराष्ट्र साहित्य परिषद व अखिल भारतीय मराठी बालकुमार साहित्य संस्था, संगमनेर यांच्या संयुक्तवतीने मातोश्री लॉन्स येथे आयोजित बालकुमार साहित्य संमेलनात स्वागताध्यक्ष पदावरून त्या बोलत होत्या. १०१ वे साहित्य संमेलन संगमनेरमध्ये घेण्याच्या घोषणेनंतर उपस्थित साहित्यिक, शिक्षक आणि विद्यार्थ्यांनी टाळ्यांच्या उत्स्फूर्त कडकडाटात या प्रस्तावाचे स्वागत केले.
बोलताना दुर्गाताई तांबे म्हणाल्या की, संगमनेरला पाच नद्यांचा संगम लाभला असून कवी अनंत फंदी यांच्यापासून विचारवंतांची आणि साहित्यिकांची मोठी परंपरा लाभली आहे. अनेक नामवंत साहित्यिक, कवी आणि लेखक आज संगमनेरचे नाव संपूर्ण महाराष्ट्राच्या साहित्य विश्वात उज्ज्वल करत आहेत.
लोकनेते बाळासाहेब थोरात व माजी आमदार डॉ. सुधीर तांबे यांच्या मार्गदर्शनाखाली संगमनेरमध्ये सातत्याने विविध वैचारिक व सांस्कृतिक उपक्रमांचे आयोजन होत असते. २०१० मध्ये संगमनेर पार पडलेल्या बालकुमार साहित्य संमेलनात विजया वाड आणि मंगेश पाडगावकर यांच्यासारख्या दिग्गजांची उपस्थिती लाभली होती. साहित्यामधून संस्कार आणि संस्कृतीचे शिक्षण मिळते, असे त्यांनी अधोरेखित केले.
तसेच सहकारमहर्षी भाऊसाहेब थोरात यांनी ‘अमृत मंथन’ व ‘अमृत गाथा’ ही पुस्तके लिहिली, ज्यातून या तालुक्याचा आणि सहकाराचा गौरवशाली इतिहास उभा राहतो. हे बालकुमार साहित्य संमेलन नगर जिल्ह्यामध्ये संगमनेर येथे होत असल्याचा मोठा अभिमान असून, यासाठी संगमनेर साहित्य परिषदेचे अध्यक्ष अनिल देशपांडे व सर्व सदस्यांनी मोठे परिश्रम घेतले आहेत, असे सांगत त्यांनी सर्वांचे कौतुक केले.
