महात्मा गांधी जयंतीनिमित्त संगमनेरमध्ये जयहिंदच्या वतीने विविध उपक्रम; १५७ विद्यार्थ्यांची प्रभात फेरी अन् ‘जवाहरलाल हाजीर हो’ पुस्तकाचे प्रकाशन

महाराष्ट्र संवाद न्यूज ऑनलाईन –
संपूर्ण जगाला सत्य व अहिंसेचा संदेश देणारे राष्ट्रपिता महात्मा गांधी यांच्या १५७ व्या जयंतीनिमित्त जयहिंद लोकचळवळीच्यावतीने संगमनेर शहरात भरगच्च कार्यक्रमांचे आयोजन करण्यात आले आहे. काँग्रेसचे ज्येष्ठ नेते बाळासाहेब थोरात यांच्या प्रमुख उपस्थितीत आणि जयहिंदचे संस्थापक डॉ. सुधीर तांबे यांच्या मार्गदर्शनाखाली होणाऱ्या या महोत्सवात सकाळी १५७ विद्यार्थ्यांची गांधीवेषातील प्रभात फेरी, भजन संध्या आणि दुपारी ‘जवाहरलाल हाजीर हो’ या पुस्तकाचा प्रकाशन सोहळा रंगणार आहे.
२ ऑक्टोबर रोजी सकाळी साडेसात वाजता यशोधन कार्यालय येथील मैदानापासून महात्मा गांधींजींची वेशभूषा केलेल्या १५७ विद्यार्थ्यांची भव्य प्रभात फेरी काढण्यात येईल. त्यानंतर सकाळी साडेआठ वाजता संगमनेर बस स्थानक येथे गांधीजींच्या आवडत्या भजनांचा कार्यक्रम आयोजित केला असून, तिथे रांगोळीच्या माध्यमातून महात्मा गांधींची भव्य प्रतिमा साकारली जाणार आहे. याप्रसंगी माजी मंत्री बाळासाहेब थोरात आणि आमदार सत्यजित तांबे यांच्यासह विविध क्षेत्रांतील मान्यवर उपस्थित राहतील.
दुपारी साडेचार वाजता सहकारमहर्षी भाऊसाहेब थोरात महाविद्यालयातील के.बी. दादा सभागृहात पंकज चतुर्वेदी लिखित आणि डॉ. राहुल कोसंबी अनुवादित ‘जवाहरलाल हाजीर हो’ या पुस्तकाचे प्रकाशन बाळासाहेब थोरात यांच्या हस्ते होणार आहे. या सोहळ्यासाठी ज्येष्ठ साहित्यिक प्रा. रंगनाथ पठारे आणि प्रमुख वक्ते संजय आवटे उपस्थित राहणार असून, संजय आवटे यांचे विशेष व्याख्यानही आयोजित करण्यात आले आहे.
या कार्यक्रमाला श्रीमती प्रमिला माया नारायण, गणेश घुले, माजी नगराध्यक्ष दुर्गाताई तांबे, युवक काँग्रेस अध्यक्षा डॉ. जयश्रीताई थोरात, नगराध्यक्ष डॉ. मैथिलीताई तांबे यांच्यासह अनेक प्रतिष्ठित नागरिक उपस्थित राहतील. या सर्व कार्यक्रमांना संगमनेरकर नागरिकांनी मोठ्या संख्येने उपस्थित राहावे, असे आवाहन जयहिंद लोकचळवळीच्यावतीने करण्यात आले आहे.