संगमनेरकरांची सुरक्षा होणार अधिक भक्कम; नगरपरिषदेसाठी २ नवीन अग्निशामक वाहनांना प्रशासकीय मान्यता, आमदार अमोल खताळ यांच्या प्रयत्नांना यश! साक्षी सूर्यवंशी यांची माहिती

महाराष्ट्र संवाद न्यूज ऑनलाईन-
संगमनेर शहराचा वाढता विस्तार आणि नागरिकांची सुरक्षा विचारात घेता, नगरपरिषदेच्या ताफ्यात दोन नवीन अत्याधुनिक अग्निशामक वाहने दाखल होण्याचा मार्ग मोकळा झाला आहे. महाराष्ट्र अग्निसुरक्षा अभियान योजनेंतर्गत या वाहनांच्या खरेदीसाठी प्रशासकीय मान्यता मिळाली असून, आमदार अमोल खताळ यांच्या विशेष प्रयत्नांमुळे संगमनेरकरांच्या सुरक्षेत मोठी भर पडली आहे.
शहरातील वाढती लोकसंख्या, वेगाने होणारे नागरीकरण आणि भविष्यातील आपत्कालीन परिस्थितीचा सामना करण्यासाठी अग्निशमन यंत्रणा अधिक सक्षम असणे गरजेचे होते. हीच गरज ओळखून नगरसेविका साक्षी सूर्यवंशी यांनी आमदार अमोल खताळ यांच्याकडे नगरपरिषदेच्या अग्निशमन विभागाची क्षमता वाढविण्याची मागणी केली होती. या मागणीचे गांभीर्य लक्षात घेऊन आमदार खताळ यांनी तातडीने राज्याचे नगरविकास मंत्री तथा उपमुख्यमंत्री एकनाथ शिंदे यांच्याकडे पाठपुरावा केला.
उपमुख्यमंत्री एकनाथ शिंदे यांनी या मागणीला सकारात्मक प्रतिसाद देत संगमनेर नगरपरिषदेसाठी २ नवीन अग्निशामक वाहने मंजूर केली आहेत. या नव्या गाड्यांमुळे शहरात किंवा परिसरात आग, अपघात अथवा कोणतीही आपत्कालीन घटना घडल्यास तातडीने मदत पोहोचवणे शक्य होणार आहे. यामुळे अग्निशमन विभागाची कार्यक्षमता वाढून शहरवासीयांना अधिक जलद आणि प्रभावी आपत्कालीन सेवा मिळणार आहे.

“संगमनेर शहराच्या सुरक्षिततेच्या दृष्टीने नवीन अग्निशामक वाहने उपलब्ध व्हावीत यासाठी आमदार अमोल खताळ यांनी उपमुख्यमंत्री एकनाथ शिंदे यांच्याकडे सातत्यपूर्ण पाठपुरावा केला होता. या मागणीला यश आले असून दोन अग्निशामक वाहनांना प्रशासकीय मान्यता मिळाली आहे. यामुळे भविष्यात आपत्कालीन परिस्थितीत नागरिकांना अधिक सक्षम आणि जलद अग्निशमन सेवा उपलब्ध होण्यास मोठी मदत होईल. — साक्षी सूर्यवंशी, नगरसेविका.