नाशिक-पुणे रेल्वे सिन्नर-संगमनेर मार्गानेच झाली पाहिजे! आमदार सत्यजीत तांबे यांचा सरकारला थेट इशारा, अन्यथा आता मुंबई-पुणे एक्स्प्रेस वे रोखणार

महाराष्ट्र संवाद न्यूज ऑनलाईन-
नाशिक-पुणे रेल्वेमार्ग हा सिन्नर, संगमनेर आणि अकोले या सरळ मार्गानेच गेला पाहिजे, अशी ठाम भूमिका आमदार सत्यजीत तांबे यांनी मांडली आहे. जर सरकारने आणि काकोडकर समितीने जनतेच्या भावनांकडे दुर्लक्ष केले, तर येत्या काळात तीव्र आंदोलन उभारून थेट मुंबई-पुणे एक्सप्रेस वे रोखू, असा थेट इशारा तांबे यांनी दिला आहे.
नाशिक-पुणे रेल्वे मार्गाचा तिढा दिवसेंदिवस अधिकच तीव्र होत असून या प्रश्नावरून आता आंदोलनाचा पवित्रा अधिक आक्रमक करण्यात आला आहे. नाशिक-पुणे रेल्वेच्या संदर्भात स्थानिक नागरिकांनी व शेतकऱ्यांनी एकत्र येत मोठे आंदोलन उभारले होते. या आंदोलनानंतर डॉ. अनिल काकोडकर समितीला अहवाल सादर करण्यासाठी ६० दिवसांची मुदत देण्यात आली होती. ही मुदत आता लवकरच संपणार असून समितीची केवळ एक बैठक झाल्याची माहितीही समोर येत आहे. मात्र, समितीने केवळ तांत्रिक मुद्द्यांवर विचार न करता सामान्य जनतेला विश्वासात घेऊन त्यांची जनसुनावणी घेतली पाहिजे, अशी मागणी तांबे यांनी केली आहे.
राज्य सरकारने नेमलेल्या काकोडकर समितीने जनतेच्या भावना समजून घेऊनच अहवाल सादर केला पाहिजे, असा दबाव जनतेचा आहे. यापूर्वी समृद्धी महामार्ग रोखून सरकारने दखल घेण्यास भाग पाडले होते, आता जर रेल्वेचा मार्ग बदलण्याचा किंवा जनतेवर अन्याय करण्याचा प्रयत्न झाला, तर थेट पुणे-मुंबई एक्सप्रेस वे बंद करू, असा आक्रमक इशारा सत्यजीत तांबे यांनी प्रसारमाध्यमांशी बोलताना दिला आहे.