अहिल्यानगर जिल्हा बँकेच्या रणधुमाळीत मोठा ट्विस्ट: संगमनेरमधून यांची उमेदवारी फायनल; बाळासाहेब थोरातांच्या भूमिकेकडे जिल्ह्याचे सर्वांचे लक्ष!

महाराष्ट्र संवाद न्यूज ऑनलाईन-
अहिल्यानगर जिल्हा मध्यवर्ती सहकारी बँकेच्या निवडणुकीचे बिगुल वाजताच जिल्ह्यातील राजकीय वातावरण कमालीचे तापले आहे. या अत्यंत प्रतिष्ठेच्या लढतीत संगमनेर तालुका सोसायटी मतदारसंघातून रणजीतसिंह देशमुख यांची, तर भटक्या-विमुक्त जाती-जमाती मतदारसंघातून गणपतराव सांगळे यांची उमेदवारी निश्चित झाल्याने निवडणुकीत मोठी रंगत निर्माण झाली आहे.
संगमनेरमधील सहकार आणि राजकीय समीकरणांवर तसेच अहिल्यानगर जिल्हा मध्यवर्ती सहकारी बँकेवर काँग्रेसचे ज्येष्ठ नेते माजी मंत्री बाळासाहेब थोरात यांचा नेहमीच मोठा प्रभाव राहिला आहे. ज्येष्ठ नेते थोरात यांच्या मार्गदर्शनाखाली आणि राजकीय रणनीतीनुसार संगमनेर मतदारसंघातून रणजीतसिंह देशमुख, गणपतराव सांगळे यांना निवडणुकीच्या मैदानात उतरवण्यात आल्याने या जागेवरील लढत अधिकच रंजक आणि राजकीयदृष्ट्या महत्त्वाची मानली जात आहे.
बाळासाहेब थोरात यांच्या भक्कम पाठिंब्यामुळे संगमनेरच्या सहकार क्षेत्रातील ताकद पुन्हा एकदा सिद्ध करण्यासाठी देशमुख, सांगळे पूर्ण ताकदीनिशी उतरले आहेत. बँक बिनविरोध होण्यासाठी पाऊले टाकली जात असतानाच या मतदारसंघातील गणितांना नवे वळण मिळाले आहे.
अहिल्यानगर जिल्ह्याच्या ग्रामीण अर्थकारणाची नाडी असलेल्या जिल्हा बँकेच्या सत्तेच्या चाव्या नक्की कोणाच्या हातात जाणार आणि बाळासाहेब थोरातांचा राजकीय डावपेच किती यशस्वी ठरणार, याबद्दल संपूर्ण जिल्ह्यात प्रचंड उत्सुकता निर्माण झाली आहे.