तत्कालीन मंत्री बाळासाहेब थोरात यांचा एक फोन आणि सोयाबीनला ४ हजार रुपयांची मदत; दुष्काळात शेतकऱ्यांना जाणवू लागली अनुभवी नेतृत्वाची उणीव

महाराष्ट्र संवाद न्यूज ऑनलाईन-
महाराष्ट्रात अल निनोच्या प्रभावामुळे यंदा पावसाने दांडी मारल्याने राज्यभरात १९७२ पेक्षाही भीषण दुष्काळाची छाया पसरली आहे. हाताशी आलेली पिके वाया गेल्याने शेतकरी आणि सर्वसामान्य नागरिक पुरते हादरले आहेत. महाविकास आघाडी सरकारच्या काळात शेतकऱ्यांना विनाअट दोन लाखांपर्यंत कर्जमाफी मिळाली होती. परंतु सध्याचे सरकार केवळ दुष्काळ पाहणी दौरे, आढावा बैठका आणि हवेतील घोषणांमध्येच व्यस्त असल्याचा थेट आरोप शेतकरी वर्ग करत आहे. अशा अत्यंत बिकट परिस्थितीत राज्यातील सर्वसामान्यांना आणि शेतकऱ्यांना माजी कृषिमंत्री बाळासाहेब थोरात यांच्या कार्यकाळातील धोरणात्मक निर्णयक्षमतेची तसेच शेती-मातीची जाण असणाऱ्या खऱ्या नेतृत्वाची तीव्र उणीव भासू लागली आहे.
काँग्रेस सरकारच्या काळात बाळासाहेब थोरात यांनी तब्बल सहा वर्षे राज्याचे कृषी खाते यशस्वीपणे सांभाळले. या कार्यकाळात अतिवृष्टी असो वा दुष्काळ, शेतकऱ्यांना कायम भरीव व तात्काळ मदत मिळाली. असाच एक प्रसंग आठवताना शेतकरी सांगतात की, तत्कालीन मुख्यमंत्री विलासराव देशमुख हे अमेरिकेच्या दौऱ्यावर असताना कृषिमंत्री बाळासाहेब थोरात चंद्रपूर जिल्ह्यातील शेतकऱ्यांच्या बांधावर प्रत्यक्ष परिस्थितीची पाहणी करत होते. तेथे सोयाबीन उत्पादक शेतकऱ्यांच्या व्यथा ऐकून थोरात यांनी क्षणाचाही विलंब न लावता थेट बांधावरूनच मुख्यमंत्र्यांना फोन लावला.
विलासराव देशमुख यांनीही प्रसंगावधान राखून शेतकऱ्यांना तातडीने मदत देण्यास मंजुरी दिली. बाळासाहेब थोरात यांच्या एका फोनवर सोयाबीनसाठी हेक्टरी त्यावेळी ४ हजार रुपयांची मदत तात्काळ मंजूर झाली होती. या ऐतिहासिक आणि संवेदनशील निर्णयाच्या आठवणी आजची तरुण पिढी सोशल मीडियावरील रिल्स आणि पोस्टच्या माध्यमातून पुन्हा एकदा जाग्या करत आहे.
सध्याच्या गंभीर दुष्काळी संकटात ज्येष्ठ नेते खासदार शरद पवार आणि काँग्रेस नेते बाळासाहेब थोरात यांनी पंचनाम्यांचा फार्स बंद करून राज्यात तात्काळ सरसकट दुष्काळ जाहीर करण्याची आक्रमक मागणी केली. बाळासाहेब थोरात यांच्या नेतृत्वाखाली संगमनेरमध्ये भव्य ‘जनआक्रोश मोर्चा’ही काढण्यात आला. या दबावामुळे सरकारने दुष्काळ तर जाहीर केला, मात्र प्रत्यक्ष कोणतीही आर्थिक मदत अद्याप शेतकऱ्यांपर्यंत पोहोचलेली नाही. पाणी आणि चाऱ्याचा अत्यंत भीषण तुटवडा निर्माण झाल्याने बळीराजाने जीवापाड जपलेली जनावरे अश्रू ढाळत बाजारात विक्रीस काढली आहेत.
दुसरीकडे संगमनेर तालुक्यातील परिस्थितीदेखील अत्यंत बिकट झाली आहे. बाळासाहेब थोरात महसूल व कृषिमंत्री असताना संगमनेर तालुक्याला दुष्काळ आणि अतिवृष्टीत नेहमीच मोठा निधी व मदत मिळाली. मात्र सध्याच्या दुष्काळात तालुका वाऱ्यावर सोडला गेला आहे. विशेष म्हणजे मागील वर्षी जिल्ह्यातील सर्व तालुक्यांना पीक विमा मंजूर झाला असताना संगमनेर तालुक्याला जाणीवपूर्वक त्यातून वगळण्यात आले. तरीही येथील नवीन लोकप्रतिनिधी गप्प बसून आहेत.
केवळ फ्लेक्सबाजी करणाऱ्या लोकप्रतिनिधींच्या निष्क्रियतेवर जनता प्रचंड नाराज असून, या संकटातून मार्ग काढण्यासाठी माजी मंत्री थोरात यांनीच पुन्हा एकदा मैदानात उतरावे, अशी ठाम भावना नागरिक व्यक्त करत आहेत.