प्रत्येक एफआयआर माझ्यासाठी एखाद्या मेडल प्रमाणे; ज्ञानेशकुमार यांच्या राजीनाम्याशिवाय माघार नाही- राहुल गांधी

विशेष प्रतिनिधी / नवी दिल्ली

मुख्य निवडणूक आयुक्त ज्ञानेश कुमार यांचा राजीनाम्याची मागणी करत काँग्रेससह विरोधकांच्या खासदारांनी दिल्लीत मंगळवारी मोठे आंदोलन केले. यावेळी, पोलिसांनी त्यांना अडवले आणि अटक केली. त्यानंतर दोन तासांनी त्यांची सुटका करण्यात आली. पण, दुसऱ्या दिवशी बुधवारी (७ ऑक्टोबर) पुन्हा एकदा इंडिया आघाडी निवडणूक आयोगाविरोधात आक्रमक झाल्याचं पाहायला मिळाली. यावेळी, राहुल गांधींनी पुन्हा एकदा सरकारवर आणि निवडणूक आयोगावर निशाणा साधला. प्रत्येक एफआयआर माझ्यासाठी मेडल असल्याचं सांगत त्यांनी ज्ञानेश कुमार राजीनामा देत नाहीत तोपर्यंत आमचा विरोध कायम राहणार असल्याचं त्यांनी जाहीर केलं.

काँग्रेसचे अध्यक्ष मल्लिकार्जुन खर्गे यांनी दिल्लीमधील जनपथ येथील निवासस्थानी इंडिया आघाडीच्या प्रमुख नेत्यांसाठी विशेष स्नेहभोजनाचं आयोजन केलं होतं. या बैठकीला काँग्रेस सरचिटणीस के. सी. वेणुगोपाल, तृणमूल काँग्रेसचे खासदार डेरेक ओ ब्रायन, राजदचे खासदार मनोज झा, माकपचे जॉन ब्रिटास, झामुमोचे खासदार विजय यांच्यासह अनेक वरिष्ठ खासदार उपस्थित होते.

याठिकाणीच ज्ञानेश कुमारांविरोधात पुन्हा आंदोलन करण्याचं नियोजन झाल्याचं सांगण्यात आलं. त्यानंतर साधारण दुपारी एक वाजता विरोधी पक्षाची बैठक पार पडली. बैठकीनंतर लोकसभा विरोधी पक्षनेते राहुल गांधी म्हणाले की, “आमची विरोधी पक्षाची बैठक झाली असून याठिकाणी सर्व खासदारांनी हजेरी लावली होती. इथे दुपारच्या जेवणादरम्यान चर्चा झाली आणि आता पुन्हा एकदा आंदोलन करण्याचा निर्णय झाला.

जवळपास 3 बस पोहोचल्या असून सर्व खासदार हे जंतरमंतरवर पोहोचणार आणि तिथून आंदोलनाला सुरुवात होईल. माझ्यावर ४५ एफआयआर दाखल आहेत, त्यामुळे माझ्यावर १०० एफआयआर दाखल झाले तरी काही समस्या नाही. एफआयआर माझ्यासाठी एखाद्या मेडलप्रमाणेच आहे. आम्ही जंतरमंतरवर आंदोलन करु, पण निवडणूक आयुक्त ज्ञानेश कुमारांचा राजीनामा घेणारच.” असा आक्रमक पवित्रा त्यांनी यावेळी घेतल्याचे दिसून आले.

 विरोधी खासदारांनी पुन्हा एकदा निवडणूक आयोगाच्या कार्यालयाकडे कूच करण्याचे संकेत दिल्यानंतर दिल्ली पोलीस प्रशासन पूर्णपणे सतर्क झालं आहे. नवी दिल्ली पोलीस उपायुक्तांच्या नेतृत्वात दिल्ली पोलीस आणि निमलष्करी दलाच्या तुकड्यांना घटनास्थळी तैनात करण्यात आलं आहे. खासदारांचा हा मोर्चा कोणत्याही परिस्थितीत निवडणूक आयोगाच्या कार्यालयापर्यंत पोहोचू नये, यासाठी पोलिसांकडून रस्ते बंद करण्यात आले आहेत. याठिकाणी बॅरेकेडिंग वाढवण्यात आले आहेत. त्यामुळे पुन्हा एकदा दिल्लीत हायव्होल्टेज ड्रामा पाहायला मिळणार आहे.