‘एस. आर. थोरात मिल्क प्रॉडक्ट्स’कडून दूध उत्पादक शेतकऱ्यांना १६ कोटी ३१ लाखांचे वाटप; विविध उपक्रमांद्वारे शेतकरी हिताला प्राधान्य

महाराष्ट्र संवाद न्यूज ऑनलाईन-
संगमनेरच्या एस. आर. थोरात मिल्क प्रॉडक्ट्स प्रायव्हेट लिमिटेड या दूध उद्योग समूहाने दूध उत्पादक शेतकऱ्यांच्या आर्थिक हिताला सातत्याने सर्वोच्च प्राधान्य दिले आहे. दीपावलीच्या पार्श्वभूमीवर चालू हंगामात ३१ ऑक्टोबरपर्यंतचे आगाऊ पेमेंट, वाहतूक भाडे, वितरक कमिशन, कर्मचाऱ्यांचा पगार आणि बोनस अशा विविध माध्यमातून एकूण १६ कोटी ३१ लाख रुपयांची रक्कम दूध उत्पादक सभासदांच्या बँक खात्यावर थेट वर्ग करण्यात आली असल्याची माहिती संस्थेचे चेअरमन आबासाहेब थोरात यांनी दिली आहे.
शेतकऱ्यांना आर्थिक स्थैर्य मिळवून देण्यासाठी हा समूह गेल्या ३३ वर्षांपासून सातत्याने प्रयत्नशील असून थोरात डेअरीने नेहमीच गुणवत्तापूर्ण दूध संकलन, स्वच्छता आणि पारदर्शक व्यवहाराच्या माध्यमातून शेतकरी व ग्राहकांचा विश्वास संपादन केला आहे. अन्न व औषध प्रशासनाचे आयुक्त तुकाराम मुंढे यांनी महाराष्ट्रातील दूध व दुग्धजन्य पदार्थांमधील भेसळ तसेच बनावटपणा रोखण्यासाठी प्रभावी कारवाया केल्या. या कारवायांमुळे शुद्ध व गुणवत्तापूर्ण दूध आणि दुग्धजन्य पदार्थांची मागणी वाढण्यास मोठी मदत झाली आहे. या सकारात्मक परिणामांचा प्रत्यक्ष फायदा दूध उत्पादक शेतकऱ्यांना झाला असून, कंपनीला वर्षभर स्थिर व रास्त दराने दूध खरेदी टिकवून ठेवणे शक्य झाले आहे.
चालू आर्थिक वर्षातही दूध उत्पादनाचा खर्च आणि शेतकऱ्यांचे आर्थिक हित लक्षात घेऊन वर्षभर स्थिर व उच्च दूध खरेदी दर देण्यावर समूहाने विशेष भर दिला आहे. तसेच, शेतकऱ्यांचा पशुखाद्यावरील खर्च कमी व्हावा या उद्देशाने २५ टक्के प्रथिने असलेले ‘संगमगिरी डायमंड’ आणि २२ टक्के प्रथिने असलेले ‘संगमगिरी गोल्ड’ हे पशुखाद्य वाजवी दरात उपलब्ध करून दिले जात आहे.
यावेळी संस्थेचे संचालक पृथ्वीराज थोरात यांनी दुष्काळसदृश परिस्थितीवर भाष्य केले. सध्याच्या परिस्थितीत पाणीटंचाई, जनावरांसाठी पुरेसा चारा उपलब्ध करणे आणि पशुधनाचे आरोग्य जपणे ही शेतकऱ्यांसमोरील प्रमुख आव्हाने आहेत. दुष्काळाचे परिणाम केवळ पुढील पावसाळ्यापर्यंत मर्यादित न राहता शेतीचे उत्पादन पूर्वपदावर येईपर्यंत जाणवू शकतात. मागील काही वर्षांचा अनुभव पाहता, एका दुष्काळाचा परिणाम सलग दोन हंगामांवर होत असल्याचे दिसते. त्यामुळे शेतकऱ्यांनी दीर्घकालीन परिस्थितीचा विचार करून जलनियोजन, चारा नियोजन, पशुसंवर्धन आणि उपलब्ध शासकीय योजनांचा पुरेपूर लाभ घ्यावा, असे आवाहन त्यांनी केले.
संचालक इंद्रजित थोरात यांनी सांगितले की, जनावरांचे संगोपन, योग्य आहार व्यवस्थापन, आरोग्याची काळजी आणि दूध उत्पादन वाढ याविषयी माहितीपूर्ण व्हिडिओ तयार करून सोशल मीडियाच्या माध्यमातून उपलब्ध करून देण्यात आले आहेत. तसेच, शासनाच्या विविध योजनांची माहिती शेतकऱ्यांपर्यंत पोहोचवण्यासाठी समूहाच्या ‘मी शेतकरी’ आणि ‘संकलन पॉईंट’ या ॲप्सच्या माध्यमातून महत्त्वपूर्ण अपडेट्स दिले जात आहेत.
दिवाळीच्या औचित्याने एस. आर. थोरात डेअरीच्या वतीने सर्व दूध उत्पादक शेतकरी बांधव, पशुवैद्यकीय डॉक्टर तसेच दुग्ध व्यवसायाशी संबंधित सर्व घटकांना दीपावलीच्या शुभेच्छा देण्यात आल्या.