महाराष्ट्र संवाद न्यूज नेटवर्क
कोणत्याही कामाजी लाज न बाळगता विविध व्यवसायात महिलांनी पारंगत झाले पाहिजेत. सक्षम होवून आपल्या पायावर उभे राहण्यासाठी विज्ञानवादी विचारसरणी स्विकारण्यासाठी मराठा सेवा संघ प्रयत्नशील आहे. सेवा संघात महिलांना मानाचे स्थान असून घरोघरी जिजाऊ पारायण होण्यासाठी जिजाऊ ब्रिगेडने पुढे यावे व चांगला समाज घडवावा असे प्रतिपादन मराठा सेवा संघाचे प्रदेश कार्याध्यक्ष प्रा. अर्जुनराव तनपुरे यांनी केले.
संगमनेर मराठा सेवा संघाचा ‘जनसंवाद’ शासकीय विश्रामगृहात झाला. यावेळी ते बोलत होते. प्रमुख अतिथी म्हणून नगराध्यक्ष दुर्गाताई तांबे, मराठा सेवा संघाचे विभागीय अध्यक्ष दीपक भदाणे, चंद्रकांत नवले, संपत देशमुख, जिजाऊ ब्रिगेड प्रदेश सदस्य डॉ. दिपाली पानसरे, जिल्हाध्यक्ष श्रध्दा वाणी, जिल्हा उपाध्यक्ष वृषाली कडलग उपस्थित होते.
तनपुरे म्हणाले, समाजातील अनिष्ठ रुढी, परंपरा नष्ट करुन कालानुरूप बदलत विज्ञानवादी समाज निर्मीतीचे काम सुरु आहे. केवळ नोकरीवर अवलंबून न राहता, सरकारी मदतीची वाट न बघता जमेल तो व्यवसाय करायला हवा. एक कोटीच्यावर सभासद संख्या असलेल्या या संघटनेत सामान्य माणसापासून ते वर्ग १ च्या अधिकाऱ्यापर्यत लाखो लोक सेवा संघाचे पदाधिकारी आहेत.
जिल्हाध्यक्ष श्रध्दा वाणी यांनी जिल्ह्याचा आढावा घेत जिल्हा पातळीवर निवड प्रक्रिया सुरु असल्याची माहिती दिली. निवड प्रक्रियेत होतकरु महिलांनी पुढे येण्याचे आवाहन त्यांनी केले. विभागीय अध्यक्ष भदाणे यांनी जनसंवाद दौऱ्याचा हेतू विषद केला.
यावेळी तालुका उपाध्यक्ष सुवर्णा खताळ, तालुका कार्याध्यक्ष नीलम शिंदे, शहराध्यक्ष वृषाली साबळे, प्रसिध्दी प्रमुख अडव्होकेट सीमा काळे, सचीव स्नेहलता कडलग, सहसचीव जयश्री चव्हाण, श्रध्दा देशमुख, उज्ज्वला देशमुख, प्रियंका सुलताने, मयुरी गाडेकर, अनुराधा काळे, कावेरी राहाणे आदी उपस्थित होत्या. माधुरी शेवाळे यांनी सूत्रसंचालन केले तर आभार दिपाली पानसरे यांनी मानले.
काळानुरुप महिलांनी बदल स्विकारावा
सध्याचे युग स्पर्धेचे युग असून या स्पर्धेच्या युगात महिलांनीदेखील बदलत्या काळानुरुप आपल्यात बदल करण्याची गरज आहे. मात्र हे बदल स्विकारत असतांना आपली संस्कृतीदेखील टिकावयास हवी याकडे लक्ष द्यायला हवे. येथील जिजाऊ ब्रिगेडच्या महिला विविध सामाजिक, सांस्कृतिक कार्यक्रमात पुढे असतात हे कौतुकास्पद आहे.
दुर्गाताई तांबे, नगराध्यक्ष
जिल्हा उपाध्यक्षपदी वृषाली कडलग, जिल्हा कार्याध्यक्षपदी निर्मला गुंजाळ
यावेळी झालेल्या पदाधिकारी निवडीत जिजाऊ ब्रिगेडच्या जिल्हा उपाध्यक्षपदी वृषाली कडलग यांची तर जिल्हा कार्याध्यक्षपदी निर्मला गुंजाळ, मालदाड ग्राम शाखा अध्यक्षपदी सुधा नवले यांच्या निवडी करण्यात आल्या. नव्या पदाधिकाऱ्यांना नियुक्तीपत्रे मान्यवरांच्या उपस्थितीत देण्यात आली.
