संगमनेर | महाराष्ट्र संवाद न्यूज
स्वामी समर्थ मंदिरापासून साई मंदिर, प्रवरा नदीवरील घाटाकडे जाणारा म्हाळुंगी नदीवरील पूल पाण्याच्या प्रवाहामुळे खचल्याने या पुलावरील शहराला पाणीपुरवठा करणाऱ्या पाईपलाईन तुटल्या आहेत. 
पालिका प्रशासनाने त्याच्या दुरुस्तीचे काम युद्धपातळीवर हाती घेतले असले तरी शुक्रवारी शहरातील बहुतांशी भागातील पाणीपुरवठा बंद राहणार आहे. अशी माहिती पालिकेचे मुख्याधिकारी राहुल वाघ यांनी दिली. 
दरम्यान गुरुवारी दुपारी नाशिक पदवीधर मतदारसंघाचे आमदार डॉक्टर सुधीर तांबे, या प्रभागाचे नगरसेवक राजेंद्र वाकचौरे व शैलेश कलंत्री, पाणीपुरवठा विभागाचे माजी सभापती सोमेश्वर दिवटे, नितीन पापडेजा आदींनी या पुलाची पाहणी केली आणि कामासंदर्भात पालिका प्रशासनाला सूचना केल्या. 
मात्र ज्या अधिकाऱ्यांच्या अखत्यारीत या पुलाचे बांधकाम येते. त्या सार्वजनिक बांधकाम विभागाचे अधिकारी मात्र येथे उपस्थित नव्हते. 
पूल खचल्याचे लक्षात येतात प्रशासनाने हा पूल वाहतुकीसाठी पूर्णतः बंद केला आहे. त्यामुळे परिसरातील नागरिकांचे मोठी गैरसोय झाल्याचे दिसून आले. पर्यायी रस्ता उपलब्ध नसल्याने दूरच्या रस्त्याने या परिसरातील नागरिकांची ये-जा सुरू होती. सार्वजनिक बांधकाम विभागाच्या माध्यमातून होणाऱ्या या पूलाच्या बांधकामास निधी अभावी किती कार्यकाल लागू शकतो याचा निश्चित अंदाज नसल्याने परिसरातील नागरिकांची मोठी गैरसोय होण्याची चिन्हे आहे. 
दरम्यान माजी मंत्री बाळासाहेब थोरात आमदार डॉ. सुधीर तांबे यांनी शासकीय पातळीवर निधी उपलब्ध होण्याकरिता पाठपुरावा सुरू केला आहे. तर पालिकेच्या अतिरिक्त असलेल्या कामास सुरुवात झाली आहे. 
दरम्यान शहराला पाणीपुरवठा करणाऱ्या पाईपलाईन तुटल्यामुळे शहरातील काही झोनवरील पाणीपुरवठा बंद राहणार आहे त्यामुळे नागरिकांनी पाण्याचा काटकसरीने वापर करण्याचे, पाणी जपून वापरण्याचे व नगरपरिषदेस सहकार्य करण्याचे आवाहन मुख्याधिकारी राहुल वाघ यांनी केले आहे.
या भागाचा पाणीपुरवठा राहणार बंद
★ नेहरू गार्डन जलकुंभ संपूर्ण झोन :- पोलीस लाईन, देवाचा मळा, मेनरोड, मोमीनपुरा, तीनबत्ती चौक, स्टेडियमजवळ, अभंग मळा, पंजाबी कॉलनी, सावता माळी नगर, माळीवाडा, अशोक चौक इत्यादी परिसर.
★ परदेशपुरा टाकीवरील झोन :- नाईकवाडपुरा, परदेशपुरा, घासबाजार, देवीगल्ली, जोर्वेरोड चौक, डाके मळा, सय्यदबाबा चौक इत्यादी परिसर
