महाराष्ट्र संवाद न्यूज नेटवर्क
दीपावली सणाच्या पार्श्वभूमीवर संगमनेर नगर परिषदेने आपल्याकडे सेवेत असलेल्या आणि सेवानिवृत्त झालेल्या कर्मचाऱ्यांना विविध देय रकमेपोटी सुमारे एक कोटी रुपयांचे वाटप केले आहे. अशी माहिती पालिकेचे प्रशासक तथा प्रांताधिकारी डॉ. शशिकांत मंगरूळे आणि मुख्याधिकारी राहुल वाघ यांनी दिली.
दीपावली सण उत्साहात व आनंदात साजरा करण्यासाठी नगर परिषदेचे प्रशासक डॉ. शशिकांत मंगरुळे व मुख्याधिकारी राहुल वाघ यांच्या मार्गदर्शनाखाली नियोजन करतांना कायम सेवेत असलेल्या कर्मचाऱ्यांना शासन निर्णयाप्रमाणे दीपावली सण अग्रीम तसेच कायम कर्मचाऱ्यांसह सेवानिवृत्त कर्मचाऱ्यांना सातवा वेतन आयोगाच्या फरकापोटी ही रक्कम अदा करण्यात आली आहे. तसेच शासन निर्णयाप्रमाणे दीपावली सणानिमित्त माहे ऑक्टोबर महिन्याचे वेतन 22 तारखेपर्यंत करणार असल्याची माहिती देण्यात आली आहे.
शहरातील नागरिकांना नगर परिषदेच्यावतीने मूलभूत सेवा पूरवितांना कर्मचाऱ्यांचा मोठा सहभाग असून कुठल्याही वेळेचा विचार न करता सर्व कर्मचारी तत्पर सेवा देतात. त्यामुळे त्यांच्या प्रति सहानुभूती असून कर्मचाऱ्यांचे प्रश्न सोडविण्यासाठी नेहमीच अग्रक्रम दिला जातो. कर्मचाऱ्यांना दिवाळीपूर्वी रक्कम प्रदान करण्यात यावी, यासाठी नगर परिषदेचे उपमुख्य अधिकारी सुनील गोरडे, कार्यालय निरीक्षक राजेश गुंजाळ, लेखापाल अशोक गवारे, अंतर्गत लेखापरीक्षक साधना ढेपले, धनश्री पैठणकर, आस्थापना विभागाचे शिरीष तिवारी, शांताराम अभंग, उदय पाटील आदींनी परिश्रम घेतले.
सर्वांचा दीपावली सण आनंदात व उत्साहात जावो अशी सदिच्छा व्यक्त करून दीपावली सणानिमित्त डॉ. शशिकांत मंगरुळे व मुख्याधिकारी राहुल वाघ यांनी सर्व कर्मचाऱ्यांना शुभेच्छा दिल्या. तर कर्मचाऱ्यांच्या वतीनेही या दोन्ही अधिकाऱ्यांना शुभेच्छा देण्यात आल्या.
