महाराष्ट्र संवाद न्यूज नेटवर्क
लंम्पी चर्मरोगाचा प्रादुर्भाव पुशधनामध्ये मोठ्या प्रमाणात वाढत आहे. एकट्या संगमनेर तालुक्यामध्ये लम्पी चर्मरोगाने मृत झालेल्या पशुधनाची संख्या मंगळवारपर्यत ६५ वर गेली आहे. यापैकी ४२ पशुधनाचे नुकसान भरपाईचे प्रस्ताव वरिष्ठ कार्यालयाकडे सादर केले असून उर्वरित प्रस्ताव दाखल करण्याचे काम सुरु असल्याची माहिती तहसिलदार अमोल निकम यांनी दिली.
राज्यात उद्भवलेल्या गो व महिप वर्गीय पशुधनातील लम्पी चर्मरोगावर नियंत्रण ठेवण्यासाठी गठीत करण्यात आलेल्या तालुकास्तरीय समितीची बैठक संगमनेरमध्ये तहसीलदार निकम यांच्या अध्यक्षतेखाली झाली. बैठकीसाठी गटविकास अधिकारी अनिल नागणे, सहाय्यक आयुक्त डॉ. जे. के. तिटमे, पशुधन विकास अधिकारी डॉ. नितीन जोंधळे, सहकार महर्षी भाऊसाहेब थोरात सहकारी साखर कारखान्याचे कार्यकारी संचालक जगन्नाथ घुगरकर, युटेक शुगरचे कार्यकारी संचालक बी. एन. पवार यावेळी उपस्थित होते.
बैठकीत बाधित पशुधन आणि लसीकरणाचा आढावा घेण्यात आला.
कारखान्यांचे गळीत हंगाम सुरु झाले असून ऊसतोड मजुरांकडील गुरांची साखर कारखान्याकडे वाहतुकीस परवानगी संदर्भात संबधितांना आदेश देण्यात आहे. पशुसंवर्धन विभागाच्या सुचनेनुसार लसीकरण होवून २८ दिवस पुर्ण झालेल्या पशुधनास आरोग्य प्रमाणपत्र देण्याबाबत बैठकीत सूचना देण्यात आल्या. लसीकरण न झालेल्या पशुधनाच्या साहाय्याने कोणतीही ऊस वाहतूक केली जाणार नाही. यासाठी नोडल अधिकाऱ्याची नियुक्ती केली जाणार आहे.
पशुधनास लंम्पी आजाराची बाधा झाल्यास बाधीत पशुधनाच्या विलगीकरणाची व उपचाराची जबाबदारी कारखान्यांची राहणार असल्याचे सांगण्यात आले. तसेच पशुधनावर नियंत्रणासाठी कारखाना प्रशासन, पोलीस विभाग, ग्रामपंचायत कर्मचाऱ्यांसह तपासणी नाके कार्यान्वीत करण्याच्या सुचना बैठकीत देण्यात आल्या.
संगमनेर तालुक्यामध्ये १२४ गावात १२६६ पशुधन लम्पीने बाधीत आढळले आहे. त्यापैकी ७२४ पशुधन उपचारानंतर बरे झाले. तर ४७७ बाधीत पशुधनावर उपचार सुरु आहेत. तालुक्यात १९ ऑक्टोंबरपर्यत १८७२०४ पशुधनाच्या लसीकरणाचे काम पुर्ण झाले. उपचारादरम्यान प्रतिसाद न देणाऱ्या अथवा गंभीर आजारी असलेल्या पशुधनाच्या विविध चाचण्या करण्यात येत आहेत. चाचणीच्या निष्कर्षानुसार तज्ज्ञ पशुवैद्यकाच्या सल्ल्याने उपचार पध्दतीत बदल केले जात आहे. तसेच पशुधनाचे लसीकरण, बाधीत पशुधनावर उपचार, त्यासाठी आवश्यक औषधे घरपोहोच सेवा मोफत देण्याची कार्यवाही संबधित विभागामार्फत सुरु आहे.
