महाराष्ट्र संवाद न्यूज
नगर जिल्ह्यातील 203 ग्रामपंचायतचे निवडणूक निकाल जाहीर झाले आहेत. यात सर्वाधिक 127 ग्रामपंचायतीची सरपंचपदे महाविकास आघाडीला मिळाली आहेत. उर्वरित 76 पैकी 59 सरपंचपदे भारतीय जनता पक्षाच्या वाट्याला आली. त्यामुळे राष्ट्रवादी काँग्रेस जिल्ह्यातील सर्वाधिक 83 जागा मिळविणारा मोठा पक्ष ठरला आहे.
राष्ट्रवादी काँग्रेस पाठोपाठ भाजप दुसऱ्या स्थानावर आहे. तिसऱ्या स्थानी 28 जागांवर काँग्रेस असून शिवसेना उद्धव बाळासाहेब ठाकरे पक्षाला 16 जागांवर यश मिळाले आहे. विशेष म्हणजे वंचित बहुजन आघाडी, प्रहार जनशक्ती व बाळासाहेबांची शिवसेना म्हणजे मुख्यमंत्री एकनाथ शिंदे समर्थकांनी प्रत्येकी एकेका ग्रामपंचायत सरपंचपद मिळवीत ग्रामीण राजकारणात खाते उघडले आहे.
मुख्यमंत्री एकनाथ शिंदे यांच्या बाळासाहेबांची शिवसेना पक्षाला पारनेर तालुक्यात एका ग्रामपंचायतीमध्ये, तर वंचित बहुजन आघाडी आणि प्रहार जनशक्ती पक्षाला पाथर्डी तालुक्यात प्रत्येकी एकेका ग्रामपंचायतीमध्ये सरपंचपद मिळाले आहे. याशिवाय श्रीरामपूरला माजी आमदार भानुदास मुरकुटे गटाला दोन आणि मुरकुटे व ससाणे गटाला एक, नेवाशात गडाख-घुले गटाला एक, शेवगाव मध्ये जनशक्ती मंचला एका जागेवर सरपंचपद मिळाले. राहुरीला विखे-तनपुरे गटाला एका जागी सरपंचपद मिळाले. आठ ठिकाणी अपक्षांनी सरपंचपदे पक्षीय नेत्यांच्या समर्थकांना बाजूला सारत खेचून आणली.
महाविकास आघाडीतील राष्ट्रवादी काँग्रेस, शिवसेना व काँग्रेसने एकत्रित सर्वाधिक ग्रामपंचायतींवर वर्चस्व मिळविले आहे. 203 ग्रामपंचायतींच्या निवडणुकीत जिल्ह्यात राष्ट्रवादी काँग्रेस नंबर वन असल्याचा दावा पक्षाचे जिल्हाध्यक्ष राजेंद्र फाळके यांनी केला आहे. यावेळी जनतेतून सरपंच निवडायचा असल्याने या पदासाठी चुरस होती. या पार्श्वभूमीवर, जिल्ह्यात 203 ग्रामपंचायतींपैकी 83 ठिकाणी राष्ट्रवादीचे सरपंच विराजमान झाल्याची माहिती फाळके यांनी दिली.
असे आहे सरपंचांचे तालुकानिहाय पक्षीय बलाबल
अकोले : अकरा सरपंचांपैकी राष्ट्रवादी काँग्रेस 10 आणि भाजप 1.
संगमनेर : 37 सरपंचांपैकी 26 काँग्रेस 9 भाजप आणि 2 अपक्ष.
कोपरगाव : 26 सरपंचांपैकी 15 राष्ट्रवादी काँग्रेस, 9 भाजप, 1 शिवसेना (उद्धव बाळासाहेब ठाकरे) आणि 1 अपक्ष.
श्रीरामपूर : 6 सरपंचांपैकी 2 राष्ट्रवादी काँग्रेस, 2 मुरकुटे गट, 1 मुरकुटे आणि ससाने गट, आणि 1 अपक्ष.
राहाता : 12 सरपंचांपैकी 11 भाजप, 1 राष्ट्रवादी काँग्रेस.
नेवासे : 13 सरपंचांपैकी 12 शिवसेना (उद्धव बाळासाहेब ठाकरे-गडाख गट), 1 गडाख आणि घुले गट.
शेवगाव : 12 सरपंचांपैकी 8 राष्ट्रवादी काँग्रेस 3 भाजप आणि 1 जनशक्ती.
अहमदनगर : 27 सरपंचांपैकी 12 राष्ट्रवादी काँग्रेस, 14 भाजप आणि 1 अपक्ष.
पारनेर 16 सरपंचांपैकी 13 राष्ट्रवादी काँग्रेस, 2 शिवसेना उद्धव बाळासाहेब ठाकरे, 1 बाळासाहेबांची शिवसेना (शिंदे गट).
श्रीगोंदा : 10 सरपंचांपैकी 6 राष्ट्रवादी काँग्रेस, 1 काँग्रेस, 3 अपक्ष.
कर्जत : 8 सरपंचांपैकी 5 भाजप, 2 राष्ट्रवादी काँग्रेस आणि 1 शिवसेना (उद्धव बाळासाहेब ठाकरे).
जामखेड : 3 सरपंचांपैकी 2 राष्ट्रवादी काँग्रेस आणि 1 भाजप.
