तालुक्यातील जवळे कडलग येथे शेततळ्यात पाय घसरून कृष्णा वसंत पवार या १२ वर्षीय विद्यार्थ्याचा दुर्दैवी मृत्यू झाल्याची हृदयद्रावक घटना शनिवारी घडली. कृष्णा हा बिबट्याच्या भीतीने पळताना शेततळ्यात पडल्याचा दावा त्याच्या कुटुंबीयांनी केला असून या घटनेमुळे संपूर्ण परिसरात तीव्र हळहळ व्यक्त होत आहे. घटनेचे गांभीर्य लक्षात घेऊन आमदार अमोल खताळ यांनी तातडीने घटनास्थळी धाव घेत दुःखाकुल पवार कुटुंबीयांची भेट देऊन त्यांचे सांत्वन केले. या अत्यंत कठीण प्रसंगी पवार कुटुंबीयांच्या पाठीशी ठामपणे उभे राहून शासनाकडून मिळणारी सर्व आवश्यक मदत मिळवून देण्यासाठी प्राधान्याने पाठपुरावा केला जाईल, अशी ग्वाही दिली.
कृष्णाच्या अकाली जाण्याने पवार कुटुंबीयांवर मोठा आघात झाला असून ही घटना मन हेलावून टाकणारी असल्याचे आमदार खताळ यांनी सांगितले. या दुर्दैवी घटनेनंतर परिसरातील बिबट्याच्या वाढत्या वावराचा मुद्दा पुन्हा एकदा गंभीरपणे ऐरणीवर आला आहे. मानवी वस्त्यांमध्ये बिबट्यांचे दर्शन वारंवार घडत असल्याने नागरिकांमध्ये प्रचंड भीतीचे वातावरण पसरले आहे. त्यामुळे वनविभागाने या परिस्थितीची गांभीर्याने दखल घेऊन नागरिकांच्या सुरक्षिततेसाठी तात्काळ आणि ठोस उपाययोजना कराव्यात, अशी जोरदार मागणी स्थानिक ग्रामस्थांकडून केली जात आहे.
या घटनेची सत्यता आणि वस्तुस्थिती स्पष्ट होण्यासाठी संबंधित अधिकाऱ्यांना सखोल तपासाचे निर्देश देण्यात आले आहेत. बिबट्याचा वावर असलेल्या भागात वनविभागाने केवळ पाहणी न करता तातडीने पिंजरे लावावेत आणि बिबट्याला जेरबंद करण्यासाठी नियमानुसार आवश्यक ती सर्व पावले उचलावीत, अशा स्पष्ट सूचना आमदार खताळ यांनी प्रशासनाला दिल्या आहेत. या सांत्वन भेटीदरम्यान वनपरिक्षेत्र अधिकारी नम्रता हिरे, पोलीस उपनिरीक्षक विकास काळे यांच्यासह महायुतीचे प्रमुख पदाधिकारी, कार्यकर्ते आणि ग्रामस्थ मोठ्या संख्येने उपस्थित होते.
