महाराष्ट्र संवाद न्यूज नेटवर्क
अहमदनगर : जिल्ह्यात सार्वजनिक शांतता आणि सुरक्षितता राखण्यासाठी जिल्ह्याच्या महसूल स्थळ सीमेमध्ये महाराष्ट्र पोलीस अधिनियम कलम ३७(१) अन्वय प्रतिबंधात्मक आदेश जारी करण्यात आले आहे. २९ जानेवारीच्या मध्यरात्री बारा वाजेपर्यंत हे आदेश लागू असतील.
अहमदनगरचे जिल्हाधिकारी डॉ. राजेन्द्र भोसले यांनी यासंबंधीचे आदेश काढले आहेत. या आदेशा अन्वये २९ जानेवारीच्या मध्यरात्रीपर्यंत कोणत्याही व्यक्तीस शस्त्रे, मोटे, तलवारी, भाले, दंडुके, बंदुका, सुरे, काठ्या किंवा लाठ्या किंवा शारीरिक इजा करण्यासाठी वापरता येईल अशी कोणतीही वस्तू जवळ बाळगता येणार नाही. कोणताही दाहक पदार्थ किंवा स्फोटक पदार्थ जवळ बाळगता येणार नाही. दगड किंवा इतर क्षेपणास्त्रे, किंवा क्षेपणास्त्रे सोडावयाची किंवा फेकावयाची उपकरणे किंवा साधने जवळ बाळगणे, जमा करणे किंवा तयार करणे. व्यक्ती अथवा मृतदेहांचे किंवा त्यांच्या आकृत्या किंवा प्रतिमा यांचे प्रदर्शन करण्यावर बंदी घालण्यात आली आहे.
कोणत्याही व्यक्तीच्या सभ्यता अगर नीतिमत्ता यास धक्का पोचेल अशी, व सुरक्षितता धोक्यात येईल किंवा ज्यामध्ये मानहानी करण्याची प्रवृत्ती दिसून येत असेल अशी कृती व आवेशपूर्ण भाषणे करणे, अंगविक्षेप करणे, किंवा विडंबन करणे आणि अशी चित्रे, चिन्हे, फलक किंवा इतर कोणताही जिन्नस किंवा वस्तू तयार करणे, त्यांचे प्रदर्शन करणे किंवा त्यांचा प्रसार करण्यास मनाई करण्यास या आदेशा अन्वये मनाई करण्यात आली आहे.
आदेशातून यांना वगळण्यात आले
शासकीय सेवेतील व्यक्तींना ज्यांना आपले वरिष्ठांचे आदेशानुसार कर्तव्य पूर्तीसाठी हत्यार जवळ बाळगणे आवश्यक आहे, तसेच ज्या व्यक्तींना शारिरीक दुर्बलतेच्या कारणास्तव काठी वापरणे आवश्यक आहे, अशा व्यक्तींना सदरचा वापर अनुज्ञेय राहणार असल्याचे आदेशात नमूद करण्यात आले आहे.
