महाराष्ट्र संवाद न्यूज
मुंबई – राज्याचे तत्कालीन विरोधी पक्ष नेते अजित पवार शिंदे-फडणवीस सरकारमध्ये सामील झाल्यानंतर राज्याचे विरोधी पक्षनेतेपद कोणाकडे जाणार याकडे सर्वांचे लक्ष लागले होते. अखेरीस विरोधी पक्षनेते पद काँग्रेसकडे निश्चित झाले असून या पदावर विजय वडेट्टीवार यांची नियुक्ती करण्यात आली आहे. तर बाळासाहेब थोरात यांच्याकडे विधीमंडळ पक्ष नेतेपदाची जबाबदारी कायम राहणार आहे. त्यामुळे आता सभागृहात वडेट्टीवार-थोरात विरोधकांचा किल्ला लढवताना दिसतील.
चार वर्षानंतर काँग्रेसला पुन्हा संधी: ज्या पक्षाचे सर्वाधिक आमदार त्यांचा विरोधी पक्ष नेता आणि विधान परिषदेचेही विरोधी पक्ष नेतेपद त्यांच्याकडेच असे सूत्र ठरलेले आहे. उपमुख्यमंत्री अजित पवार राष्ट्रवादी काँग्रेसमधून मोठा गट घेऊन बाहेर पडल्यानंतर सभागृहात सर्वाधिक आमदार काँग्रेसचे आहेत. त्यामुळे विरोधी पक्ष नेतेपद काँग्रेसकडे जाणार ते निश्चित होते. चार वर्षानंतर काँग्रेसकडे पुन्हा हे पद आले आहे. त्यामुळे काँग्रेसकडून या पदावर कोणाची नियुक्ती केली जाते, याचे आडाखे बांधले जात होते.
यांची नावे होती चर्चेत: विरोधी पक्षनेते पदासाठी काँग्रेस कडून बाळासाहेब थोरात अशोक चव्हाण व पृथ्वीराज चव्हाण यांच्या नावाची चर्चा होती. याशिवाय दुसऱ्या फळीतील नेते सुनील केदार, विजय वडेट्टीवार, यशोमती ठाकूर, संग्राम थोपटे यांच्या नावाची देखील चर्चा होती. अखेरीस विरोधी पक्षनेते पदावर विजय वडेट्टीवार यांना संधी देण्यात आली आहे.
तर विधिमंडळ पक्षनेते पदाची जबाबदारी बाळासाहेब थोरात यांच्याकडे कायम राहणार असल्याचे पक्षाकडून कळविण्यात आले आहे. या दोन्ही नावांमधून काँग्रेसने नव्या जुन्यांचा वेळ साधण्याचा प्रयत्न केला आहे.
अध्यक्षांना दिले पत्र: नव्या पदाधिकाऱ्यांच्या निवडीचे पत्र विधानसभेचे अध्यक्ष ॲड. राहुल नार्वेकर यांना देण्यात आले आहे. विरोधी पक्षनेता आणि विधिमंडळ पक्षनेते पदाची नावे काँग्रेसकडून जाहीर करण्यात आल्याने राज्याच्या विरोधी पक्षनेतेपदी कोण हा प्रश्न देखील आता संपला आहे.
काँग्रेस पक्षाने आ. विजय वडेट्टीवार यांची विधानसभेचे विरोधी पक्षनेते म्हणून निवड केली आहे. त्याबाबतचे पत्र आज विधानसभाध्यक्ष राहुलजी नार्वेकर यांना दिले. यावेळी माजी मुख्यमंत्री अशोकरावजी चव्हाण, विजय वडेट्टीवार, @INCMumbai अध्यक्ष वर्षाताई गायकवाड उपस्थित होते.
आ. विजय… pic.twitter.com/jMDCv9KyKO— Balasaheb Thorat (@bb_thorat) August 1, 2023
