महाराष्ट्र संवाद न्यूज
संगमनेर – उच्च शिक्षणासाठी विदेशामध्ये जात असलेले संगमनेरचे विद्यार्थी आपल्या चमकदार कामगिरीने जगामध्ये देशाचा नावलौकिक वाढवतील, असा विश्वास उद्योगपती राजेश मालपाणी यांनी व्यक्त केला.
संगमनेर मर्चंटस बँकेच्यावतीने अमेरिका आणि इंग्लंडमध्ये उच्च शिक्षणासाठी जात असलेल्या दहा विद्यार्थ्यांचा सत्कार आणि निरोप समारंभ बँकेच्या स्वामी विवेकानंद सभागृहात संपन्न झाला. याप्रसंगी मालपाणी बोलत होते. यावेळी मालपाणी उद्योग समूहाचे संचालक जय मालपाणी, स्किनवेस्ट या ब्युटी ब्रँडच्या प्रणेत्या दिव्या मालपाणी, चेअरमन संतोष करवा, व्हाईस चेअरमन प्रकाश कलंत्री आदी उपस्थित होते.
हे १० विद्यार्थी जाताहेत परदेशात : सिमरन अत्रे, जय गाडे, गंधार पानसरे, चिदंबर धापटकर, प्रणव पगडाल, तन्मय राठी, ओम कोळपकर, धनंजय सोनवणे, आयुष पडतानी या विद्यार्थ्यांनी विविध विद्याशाखांमधील उच्च शिक्षणासाठी अमेरिका आणि इंग्लंड येथील नामांकित विद्यापीठांमध्ये प्रवेश घेतला आहे. त्यासाठी येणारा खर्च बराच मोठा असल्याने संगमनेर मर्चंट बँकेच्यावतीने त्यांना आर्थिक पाठबळ देण्यात आले आहे.
चाळीस वर्षांपूर्वी अमेरिकेमध्ये शिक्षण घेताना आलेले अनुभव विद्यार्थी आणि पालकांसमोर सांगताना मालपाणी म्हणाले, हे सर्व विद्यार्थी बुद्धिमत्तेच्या बळावर जागतिक स्तरावर आपल्या मातृभूमीचे नाव झळकविणारे ‘टॉप टेन’ विद्यार्थी ठरतील. आपण केवळ विद्यार्थी नाही तर भारताचे अँबेसिडर म्हणून जात आहे. या माध्यमातून आपण देशाचे नाव नक्की उंच कराल.
जय मालपाणी यांनी इंग्लंड आणि अमेरिकेमध्ये शिक्षण घेताना कोणकोणत्या दक्षता घेतल्या पाहिजेत याची माहिती दिली. सर्वात महत्त्वाचे म्हणजे आहार आणि व्यायामाकडे लक्ष देऊन सर्वांनी शंभर टक्के तंदुरुस्त राहण्याची काळजी घ्यावी. ग्रंथालयांचा व जिमचा पुरेपूर उपयोग करावा. अर्धवेळ नोकरी करून कमवा व शिका या धोरणाचा अवलंब करावा. विदेशामध्ये विद्यार्थी म्हणून प्रत्येक क्षेत्रात मिळणार्या सवलतींचा लाभ घ्यावा, यासह अनेक महत्त्वपूर्ण टिप्स दिल्या.
दिव्या मालपाणी यांनीही विद्यार्थ्यांना तुमचे स्वप्नं साकार करण्याची सुवर्णसंधी तुमच्या गुणवत्तेमुळे मिळाली. संगमनेरमधून थेट विदेशात जात असल्यामुळे तुमचे व्यक्तिमत्व आता ग्लोबल होणार आहे. कोणतेही काम कमीपणाचे नसते, मीही तिथे जिमसुपरवायझरचे काम करून अनुभव व अर्थसहाय्य मिळविलेची माहिती दिली.
यांनीही दिल्या शुभेच्छा : चेअरमन संतोष करवा, व्हाईस चेअरमन प्रकाश कलंत्री मुख्य कार्यकारी अधिकारी दुनाखे यांनीही आपल्या भाषणातून विद्यार्थ्यांच्या उज्वल वाटचालीसाठी शुभेच्छा दिल्या.
परदेशी जाणाऱ्या विद्यार्थ्यांचा ४० फुटाच्या हाराने गौरव : कार्यक्रमाची सुरुवात श्री साईबाबांच्या प्रतिमेला जय मालपाणी व दिव्या मालपाणी यांच्या हस्ते माल्यार्पण करून करण्यात आली. विद्यार्थ्यांना सत्कारामध्ये भेटवस्तू म्हणून करवा यांच्यावतीने छानश्या लॅपटॉप बॅग समवेत राजेश मालपाणी तर्फे ओपन सिक्रेट हे आत्मचरित्र आणि स्वर्गीय उद्योगपती ओंकारनाथजी मालपाणी यांनी त्यांना देश विदेशात शिकत असताना लिहिलेल्या पत्रांचे पत्र संस्कार ही पुस्तके व सोबत एक प्रेरक पत्र देण्यात आले. सर्व विद्यार्थ्यांना एकत्रितपणे भव्य चाळीस फुटांचा भव्य पुष्पहार घालून सत्कार करण्यात आला.
विद्यार्थ्यांनी आणि त्यांच्या पालकांनी उच्च शिक्षणासाठी मर्चंटने दिलेल्या अर्थसहाय्याबद्दल भाषणातून कृतज्ञता व्यक्त केली. सूत्रसंचालन संचालक महेश डंग यांनी केले. आभार प्रदर्शन मुख्य कार्यकारी अधिकारी विनय दुनाखे यांनी मानले. कार्यक्रमाला बँकेचे संचालक राजेंद्र वाकचौरे, मधुसूदन नावंदर, मुकेश कोठारी, रवींद्र पवार, श्याम भडांगे, कीर्ती करवा, डेप्युटी जनरल मॅनेजर विजय बजाज, असिस्टंट जनरल मॅनेजर विठ्ठल कुलकर्णी आदींसह मान्यवर उपस्थित होते.
