महाराष्ट्र संवाद न्यूज
संगमनेर – समाज माध्यमातून चुकीचा मेसेज व्हायरल करून दोन समाजात तेढ निर्माण करण्याचा प्रयत्न करणारी अफवा पसरविल्याचा कारणावरून संगमनेर शहर पोलीस ठाण्यात एका व्यक्ती विरोधात गुन्हा दाखल करण्यात आला आहे.
यांच्या तक्रारीवरून गुन्हा दाखल: अभिषेक पांडुरंग जोर्वेकर असे गुन्हा दाखल करण्यात आलेल्या व्यक्तीचे नाव आहे. या संदर्भात पोलीस उपनिरीक्षक बाळासाहेब यादव यांच्या तक्रारीवरून शहर पोलीस ठाण्यात भादवी कलम 505 (2) अन्वये मंगळवारी दुपारी गुन्हा दाखल करण्यात आला आहे.
काय होता नेमका प्रकार: रविवारी सायंकाळी शहरातील जोर्वेनाका भागात एका हायमॅक्सच्या खांबावर पाकिस्तानचा ध्वज फडकविल्याचे मेसेज समाज माध्यमातून व्हायरल झाल्याने दोन समाजामध्ये तेढ निर्माण होण्याची शक्यता निर्माण झाली होती. हा व्हायरल मेसेज अनेकांच्या मोबाईलवर आल्याने कायदा सुव्यवस्थेला धोका निर्माण होण्याची चिन्हे निर्माण झाली होती.
हे अधिकारी पोहोचले घटनास्थळी: दरम्यान या प्रकाराची माहिती मिळताच संगमनेरचे पोलीस उपाधीक्षक सोमनाथ वाघचौरे, पोलीस निरीक्षक भगवान मथुरे यांनी तातडीने घटनास्थळी धाव घेतली. घटनास्थळी मोठ्या प्रमाणात गर्दी जमली होती. यामुळे देखील वातावरण बिघडण्याची चिन्हे निर्माण झाली होती.
प्रशासनाने ताब्यात घेतला झेंडा: पोलिसांनी या संदर्भात घटनास्थळी जात खात्री केली असता सदरचा झेंडा हा पाकिस्तानचा नसून इस्लाम धर्माचा असल्याचे तसेच त्याच्यावर चांद तारा असल्याचे दिसून आले. पोलीस प्रशासनाने नगरपालिकेच्या मदतीने हा झेंडादेखील काढून ताब्यात घेतला. पोलिसांनी वेळीच दखल घेतल्याने मोठा अनर्थ टळला. याप्रकरणी पोलीस निरीक्षक मथुरे यांनी समाज माध्यमातून या संदर्भात वस्तुस्थितीदर्शक मेसेज प्रसारित करत अफवा पसरविणाऱ्या विरोधात कारवाईचा इशारा दिला होता.
गुन्हा दाखल: दरम्यान व्हायरल झालेल्या मेसेज संदर्भात पोलिसांनी खात्री केली असता जोर्वेनाका येथे पाकिस्तानचा झेंडा लागला या आशयाचा अनेकांपर्यंत पोहोचलेला हा मेसेज हिंदू प्रतिष्ठान, जोर्वे या व्हाट्सअप ग्रुपवर अभिषेक पांडुरंग जोर्वेकर या इसमाने कोणतीही शहानिशा न करता खोटा संदेश प्रसारित केल्याचे समोर आल्याने या संदर्भात शहर पोलिसांनी गुन्ह्याची नोंद केली आहे.
