महाराष्ट्र संवाद न्यूज
संगमनेर – साखर कारखानदारीत सहकारासाठी मापदंड ठरलेल्या सहकार महर्षी भाऊसाहेब थोरात सहकारी साखर कारखान्याने स्वच्छ व गुणवत्तेच्या पेट्रोलबरोबर आता नव्याने गरजेचा असलेल्या पर्यावरण पूरक सीएनजी पंप कार्यान्वित केला आहे. काँग्रेस विधिमंडळ पक्षाचे नेते आमदार बाळासाहेब थोरात यांच्या हस्ते या सीएनजी पंपाचा शुभारंभ करण्यात आला.
यांची होती उपस्थिती: सहकार महर्षी भाऊसाहेब थोरात सहकारी साखर कारखाना कार्यस्थळ येथे हा सीएनजी पंप सुरू करण्यात आला असून यावेळी कारखान्याचे चेअरमन बाबासाहेब ओहोळ, उपाध्यक्ष संतोष हासे, रामहरी कातोरे, बीपीसीचे गोविंद जागीर, संचालक गणपतराव सांगळे, संपतराव गोडगे, मीनानाथ वर्पे, विनोद हासे, माणिकराव यादव, ॲड. दादासाहेब हजारे, तानाजी आहेर, कार्यकारी संचालक जगन्नाथ घुगरकर, सेक्रेटरी किरण कानवडे, सरपंच निर्मला राऊत, पेट्रोल पंप विभागाचे एकनाथ काळे आदींसह विविध मान्यवर विभाग प्रमुख व पदाधिकारी उपस्थित होते.
थोरात म्हणाले, थोरात कारखान्याने कायम काळानुरूप बदल केले आहे. पेट्रोल व डिझेलसाठी सीएनजी हा मोठा पर्याय आहे. इथेनॉल निर्मितीतून पेट्रोलला सक्षम पर्याय तयार होत आहे. वाढलेली वाहने आणि त्यामुळे होणारे पर्यावरणाचे नुकसान याकरता सीएनजीचा वापर गरजेचा ठरणार आहे. थोरात सहकारी साखर कारखान्याने कायम आदर्शवत काम केले असून अत्याधुनिक प्रणालींचा वापर केला आहे. ऊस उत्पादक, सभासद, शेतकरी, कामगार या सर्वांचा या कारखान्यावर मोठा विश्वास असून उपपदार्थ निर्मितीवरही कारखान्याने भर दिला असल्याचेही ते म्हणाले.
बाबा ओहोळ म्हणाले, काँग्रेस पक्षाचे नेते आमदार बाळासाहेब थोरात यांच्या मार्गदर्शनाखाली थोरात कारखान्याने आपली गुणवत्तेची परंपरा राखताना कायम उच्चांकी भाव दिला आहे. वाहनांना पेट्रोल मोठ्या प्रमाणात लागत असून पर्यावरण पूरक सीएनजी पंप कारखान्याने सुरू करून एक चांगली सुविधा उपलब्ध करून दिली आहे.
थोरातानी पहिल्या वाहनात भरला सीएनजी: कार्यक्रमाचे प्रास्ताविक कार्यकारी संचालक जगन्नाथ घुगरकर यांनी केले. सेक्रेटरी किरण कानवडे यांनी सूत्रसंचालन केले. एकनाथ काळे यांनी आभार मानले. याप्रसंगी आमदार थोरात यांच्या हस्ते पहिल्या गाडीला सीएनजी भरून देऊन हा पेट्रोल पंप कार्यान्वित करण्यात आला.
