महाराष्ट्र संवाद न्यूज
संगमनेर – स्वतःसह कुटुंबातील सदस्य व अन्य सहकाऱ्यांच्या मदतीने तब्बल 81 कोटी रुपयांच्या अपहारात सहभागी असलेल्या मुख्य आरोपी भाऊसाहेब कुटे याने स्वतःच्या व्यक्तिगत शुभेच्छांच्या लाखो रुपयांच्या जाहिराती ठेवीदारांच्या पैशातून वृत्तपत्रांना दिल्याचे समोर आले आहे.
कारनामे: दूधगंगा नागरी सहकारी पतसंस्थेचा तब्बल 81 कोटी रुपयांचा घोटाळा समोर आल्यानंतर या घोटाळ्यामागील मुख्य आरोपी असलेल्या भाऊसाहेब कुटे याचे एक-एक कारनामे समोर येत आहे. यातील बहुतेक कारनामे पोलिसांकडे दाखल असलेल्या फिर्यादीत (FIR मध्ये) नोंदविण्यात आले आहे.
कुटुंबातील सात जणांचा समावेश: संगमनेरच्या सहकारी पतसंस्था विश्वातील सर्वात मोठा आर्थिक अपहार म्हणून दूधगंगा नागरी सहकारी पतसंस्थेच्या 81 कोटी रुपयांच्या गैरव्यवहाराकडे बघितले जाते. विशेष म्हणजे या अपहारामध्ये जिल्हा परिषदेचा माजी सदस्य असलेल्या व संस्थेचा अध्यक्ष असलेल्या भाऊसाहेब कुटे याच्यासह त्याच्या कुटुंबातील सात जणांचा समावेश असून यात पत्नी, मुले, सून यांच्याशिवाय राहुरीतील कदम कुटुंबीय, व्यवस्थापक भाऊसाहेब विठ्ठल गुंजाळ, चीफ अकाउंटंट भाऊसाहेब संतू गायकवाड, चेतन नागराज बाबा कपाटे उर्फ सुदर्शन महाराज, संदीप दगडू जरे अशा सतरा जणांचा मुख्य आरोपीमध्ये समावेश आहे.
लेखापरीक्षकांचे घोटाळ्यास सहाय्य: याशिवाय 1 एप्रिल 2016 ते 31 मार्च 2021 या कालावधीत बँकेत रोखपाल म्हणून काम बघणाऱ्या चौघांसह दोन वैधानिक लेखापरीक्षकांनी या आर्थिक घोटाळ्यास सहाय्य केल्याचे तक्रारीत म्हटले आहे. दोन्ही लेखापरीक्षक हे नाशिकस्थित आहेत.
व्यक्तिगत शुभेच्छा जाहिरातीची उधळपट्टी: दूधगंगा नागरी सहकारी पतसंस्थेचा चेअरमन असलेल्या भाऊसाहेब कुटे याने संस्थेच्या पैशातून स्वतःच्या व्यक्तिगत शुभेच्छा जाहिरातीची उधळपट्टी केली असून या जाहिरातींवरील खर्च संस्थेच्या महसुली खर्चात दाखविण्यात आल्या आहे. जाहिरातींची ही रक्कम 6,90,719/- रुपये एवढी असल्याचे तक्रारीत म्हटले आहे. प्रत्यक्षात ही रक्कम फिर्यादीत नोंदविलेल्या रकमेपेक्षाही अधिक असल्याची शक्यता वर्तवली जात आहे.
