महाराष्ट्र संवाद न्यूज
संगमनेर – कर्जापोटी दिलेला धनादेश बँक खात्यात पुरेशी रक्कम नसल्याने वटला नाही या कारणावरून संगमनेरच्या अतिरिक्त मुख्य न्यायदंडाधिकाऱ्यांनी आरोपी कर्जदाराला सहा महिने कारावासाची व दंडाची शिक्षा ठोठावली आहे.
काय होता प्रकार: श्रीराम सिटी युनियन फायनान्स लिमिटेड या कंपनीकडून अमित व्यंकटेश कल्याणकर यांनी एक लाख रुपयांचे व्यक्तिगत कर्ज घेतले होते. कर्जाच्या फेडीसाठी कल्याणकर यांनी श्रीराम फायनान्सला 1,28,279 रुपयांचा धनादेश दिला होता. कंपनीने हा धनादेश वटण्यासाठी बँक खात्यात जमा केला असता खात्यात पुरेशी रक्कम नसल्याने सदरचा धनादेश न वटता परत आला. त्यानंतर कंपनीने कल्याणकर यांच्याकडे धनादेशाच्या रकमेची मागणी केली होती.
न्यायालयात खटला: मात्र आरोपी कल्याणकर यांनी धनादेशाची रक्कम न भरल्याने कंपनीने ॲड. आर. बी. खरे यांच्यामार्फत कल्याणकर यांच्या विरोधात न्यायालयात धनादेश अनादर प्रकरणी खटला दाखल केला होता. या खटल्याची सुनावणी सहाव्या अतिरिक्त मुख्य न्यायदंडाधिकारी डी. एम. गिरी यांच्यासमोर झाली.
आरोप सिद्ध: खटल्यामध्ये आरोपीने दिलेला धनादेश हा कायदेशीर देण्यापोटी दिला होता व तो न वटता परत आला या बाबी न्यायालयासमोर सिद्ध झाल्या. न्यायाधीश गिरी यांनी दोन्ही बाजूचा युक्तिवाद ऐकल्यानंतर आरोपी अमित कल्याणकर याला भारतीय चलनक्षम दस्तऐवज कायदा कलम 138 च्या आरोपाकरिता फौजदारी प्रक्रिया संहितेचे कलम 255(2) अन्वये दोषी ठरविले.
शिक्षा: न्यायालयाने आरोपी कल्याणकर याला सहा महिने कारावासाची शिक्षा ठोठावली. तसेच एक लाख पस्तीस हजार रुपये दंडापोटी देण्याचे आदेश दिले. दंडाच्या रकमेतून फौजदारी प्रक्रिया संहितेचे कलम 357(3) अन्वये धनादेशाची रक्कम 1,28,219 रुपये फिर्यादीला नुकसान भरपाई म्हणून देण्याचे आदेश दिले. दंड न भरल्यास आणखी तीन महिने कारावासाची शिक्षा आरोपीला भोगावे लागणार आहे.
