महाराष्ट्र संवाद न्यूज
नाशिक – नाशिक जिल्हा न्यायालयातील एका न्यायाधीशांविरोधात नाशिकच्या वकिलांनी एल्गार दिला आहे. कामकाजावेळी अरेरावी करणे, अपमानास्पद वक्तव्य करणे, उद्घटपणे वर्तणूक करणे अशा स्वरूपाचे वर्तन हे न्यायाधीश महोदय करत असल्याने त्यांची त्वरित बदली करण्याची मागणी वकिलांनी केली आहे. अन्यथा त्यांच्या समोरील कामकाजावर बहिष्कार टाकण्याचा इशारा देण्यात आला आहे.
प्रधान न्यायाधीशांना निवेदन: वकिलांनी नाशिक बार कौन्सिलच्या वतीने आपल्या मागणीचे निवेदन प्रधान जिल्हा न्यायाधीश एस. डी. जगमलानी यांना दिले. एका न्यायाधीशांच्या विरोधात वकिलांनी उघड-उघड भूमिका घेत त्यांच्या समोरील कामकाजावर बहिष्कार टाकण्याचा इशारा दिल्याने हा विषय राज्यभर चर्चेचा ठरला आहे.
तर मुंबई उच्च न्यायालयाकडे तक्रार: संबंधित न्यायाधीशांची जिल्हा विधी प्राधिकरणामध्ये बदली करण्यात यावी, अन्यथा त्या संदर्भात मुंबई उच्च न्यायालयात बार कौन्सिल तर्फे तक्रार करण्यात येईल असा असे या निवेदनामध्ये आहे. या न्यायाधीशांविरोधात वकिलांनी कौन्सिलकडे तक्रारी केल्याने नाशिक जिल्हा बार कौन्सिलची बैठक अध्यक्ष ॲड. नितीन ठाकरे यांच्या अध्यक्षतेखाली घेण्यात आली.
बैठक: बैठकीमध्ये वकिलांनी संबंधित न्यायाधीशांसमोर कामकाज करताना वकील सदस्यांना अपमानास्पद वागणूक मिळते. अरेरावी केली जाते. त्यामुळे अनेक वकील सदस्य त्या न्यायाधीशांच्या कोर्टात कामकाज करण्यात इच्छुक नाहीत, असे सांगत आपल्या तक्रारींच्या पाढा वकिलांनी बैठकीत वाचला.
उपस्थिती: बैठकीवेळी कौन्सिलचे सदस्य ॲड. जयंत जायभाये, बार कौन्सिलचे माजी अध्यक्ष ॲड. अविनाश भिडे, उपाध्यक्ष शेटे सचिव ॲड. हेमंत गायकवाड, ॲड. संजय गीते, ॲड. लीलाधर जाधव, ॲड. लाहोटी, ॲड. अरुण माळवदे, ॲड. प्रतीक शिंदे यांच्यासह विधीज्ञ उपस्थित होते. बैठकीत ॲड. अनंत कुलकर्णी, ॲड. झुंजार आव्हाड, ॲड. संतोष गटकळ, ॲड. पी. आर. गीते, ॲड. जी. डी. नवले, ॲड. केदार दंडणे, ॲड. संगीता चव्हाण आदींनी तक्रारी केल्या.
वकील सदस्यांना कामकाज करताना अपमानास्पद वागणूक देणाऱ्या न्यायाधीशांची बदली करण्याची मागणी बार कौन्सिल तर्फे करण्यात आली आहे तसे निवेदन बार कौन्सिल तर्फे प्रधान जिल्हा न्यायाधीशांना देण्यात आले ज्या न्यायाधीशान विरोधात तक्रार आहे त्या न्यायाधीशांसमोर वकील सदस्य कामकाज करण्यास इच्छुक नाहीत.
ॲड. नितीन ठाकरे, अध्यक्ष, नाशिक बार कौन्सिल.
