खासदार सदाशिव लोखंडे यांच्या उपस्थितीत महसूल मंत्री राधाकृष्ण विखे पाटील यांच्या हस्ते होणार शुभारंभ; अर्धन्यायिक प्रकरणाच्याही होणार शिर्डीत सुनावण्या…
बाळासाहेब कोळेकर शिर्डीचे पहिले अपर जिल्हाधिकारी
महाराष्ट्र संवाद न्यूज
शिर्डी – शुक्रवारपासून (15 सप्टेंबर) शिर्डीमध्ये नागरिकांच्या सेवेसाठी अपर जिल्हाधिकारी कार्यालयाचा शुभारंभ होत आहे. राज्याचे महसूल मंत्री तथा अहमदनगरचे पालकमंत्री राधाकृष्ण विखे पाटील यांच्या हस्ते या कार्यालयाचा शुभारंभ होत असून शिर्डीचे खासदार सदाशिव लोखंडे यांची यावेळी उपस्थिती राहणार आहे.
नव्याने सुरू होत असलेल्या या कार्यालयामुळे उत्तर नगरमधील कोपरगाव, राहाता, श्रीरामपूर, संगमनेर, अकोले व राहूरी या ६ तालुक्यातील नागरिकांना आता अर्धन्यायिक सुनावणी व इतर शासकीय कामांसाठी अहमदनगर येथे जाण्याची आवश्यक राहणार नसल्याने नागरिकांची मोठे पायपीट टळणार आहे.
अनेक दिवसापासून उत्तर अहमदनगर मधील नागरिकांना या कार्यालयाची प्रतिक्षा होती. या कार्यालयासाठी ६ पदांची निर्मिती करण्यात आली आहे. शिर्डीचे पहिले अपर जिल्हाधिकारी म्हणून बाळासाहेब कोळेकर यांनी पदभार स्विकारला आहे. अपर जिल्हाधिकारी हे कार्यालय प्रमुख असणार आहेत. त्याशिवाय नायब तहसीलदार, लघुलेखक (निम्नश्रेणी), अव्वल कारकून व २ लिपिक टंकलेखक कार्यरत असणार आहेत. अपर जिल्हाधिकारी कार्यालयाच्या अखत्यारित शिर्डी, संगमनेर व श्रीरामपूर प्रांतधिकारी तसेच ६ तालुक्यातील तहसीलदार, ५१ मंडळाधिकारी असणार आहेत.
काय असणार अपर जिल्हाधिकारी कार्यालयाचे कामकाज…
जिल्हाधिकारी यांच्यानंतर उत्तर नगरमधील सहा तालुक्यांतील प्रांतधिकारी, तहसीलदार, मंडळाधिकारी, तलाठी कार्यालयावर अपर जिल्हाधिकारी यांचे प्रशासकीय नियंत्रण असेल. अर्धन्यायिक प्रकरणात अपिलीय अधिकारी म्हणून अपर जिल्हाधिकारी कामकाज पाहणार आहेत. यात मुख्यत: सातबारा, फेरफार, कुळ वहिवाट, वहिवाट रस्ता अशा बऱ्याच प्रकरणात तहसीलदार किंवा उपविभागीय अधिकारी आदेश करत असतात. अशा प्रकरणात नागरिकांना अपर जिल्हाधिकारी यांच्याकडे अपिल करता येणार आहे. महसूल अधिनियम कलम २४७ अन्वये नागरिकांना हे अपील करता येणार आहे. गौण खनिजांमध्ये रेती, मुरूम, डबर, स्टोन क्रेशर खडी, विटा व माती या गौण खनिजांना परवाने देणे, विविध खाणपट्ट्यांना परवानगी देण्याचे काम अपर जिल्हाधिकारी कार्यालयामार्फत चालविले जाणार आहे.
रेती घाटाचे संपूर्ण नियोजन अपर जिल्हाधिकारी कार्यालयामार्फत होणार आहे. रेती लिलाव, मोजणी,दंडात्मक कारवाई असे विविध कामांवर नियंत्रण या कार्यालयाचे असणार आहे. सिलींग जमीन खरेदी-विक्री परवानगी देणे, नुकसान भरपाई देण्याचे कामकाज असणार आहे. उपविभागीय अधिकारी यांच्याकडील जात प्रमाणपत्र, नॉन क्रिमीलेअर प्रमाणपत्र, भूसंपादन दाखला, बिनशेती प्रकरण, वृत्तपत्र शीर्षक, ऐपतीचा दाखला आदी विविध दाखल्यांमध्ये अपिलीय अधिकारी म्हणून कामकाज केले जाणार आहे. उत्तर अहमदनगर विविध शासकीय विभागांच्या नियमित बैठका, आढावा घेणे तसेच केंद्र व राज्य शासनाच्या योजनांच्या अंमलबजावणीसाठी सर्व शासकीय विभागाचे सनियंत्रण अधिकारी म्हणून अपर जिल्हाधिकारी कामकाज करणार आहेत.
अपर जिल्हाधिकारी कार्यालयाचा असा असेल पत्ता…
अपर जिल्हाधिकारी कार्यालय,
श्री साईबाबा समाधी मंदीराच्या गेट क्रमांक २ शेजारी, शिर्डी, ता. राहता, जिल्हा अहमदनगर.
