महाराष्ट्र संवाद न्यूज
संगमनेर – नाशिक चिट्स प्रायव्हेट लिमिटेड या सरकारमान्य भिशी कंपनीच्या थकलेल्या हप्त्यापोटी दिलेला धनादेश न वटल्याने संगमनेरच्या अतिरिक्त मुख्य न्याय दंडाधिकाऱ्यांनी आरोपी व्यावसायिकाला दोषी ठरवत सहा महिन्याच्या कारावासाची व सत्तर हजार रुपये दंड तसेच दंडाची रक्कम न भरल्यास तीन महिने साध्या कारावासाची शिक्षा ठोठावली आहे.
ताहीर कादर बागवान असे शिक्षा झालेल्या आरोपीचे नाव असून बागवान याने नाशिक चिट्स या कंपनीची 50 महिन्यांसाठी दरमहा दहा हजार रुपयांची मासिक भिशी सुरू केली होती. बागवान सक्सेसिव्ह बिडर ठरल्यानंतर त्याला प्राईज मनी म्हणून कंपनीने 3 लाख 47 हजार 500 रुपयांचा धनादेश दिला होता. त्याबद्दल बागवान आणि कंपनीच्या लाभात प्रॉमिसरी नोट्स गॅरेंटी करारनामा व इतर कागदपत्रे लिहून दिले होते.
धनादेश बाउन्स: आरोपी बागवान याने उचललेल्या या पैशासाठी मासिक हप्ते भरणे आवश्यक होते. परंतु भिशीची रक्कम उचलल्यानंतर आरोपीने दरमहा हप्ते भरण्यास टाळाटाळ केली. सात हप्त्यांची 61,500 रुपयांची रक्कम थकल्याने या थकित रकमेपोटी कंपनीला धनादेश दिला होता. फिर्यादी कंपनीने धनादेश न वटल्याने आरोपी बागवान याच्याकडे पैशांची मागणी केली होती. मात्र आरोपीने कंपनीला पैसे दिले नाही म्हणून कंपनीच्या वतीने आरोपी विरोधात संगमनेरच्या जिल्हा व अतिरिक्त सत्र न्यायालयात भारतीय चलनक्षम दस्तऐवज कायदा 138 अन्वये तक्रार करण्यात आली होती.
यांच्यासमोर झाले सुनावणी: न्यायाधीश डी. एम. गिरी यांच्यासमोर या खटल्याचे कामकाज सुरू होते. नाशिक चिट्स प्रायव्हेट लिमिटेड या फिर्यादी कंपनीच्यावतीने ॲड. प्रशांत कोल्हे यांनी काम बघितले. कंपनीचे प्रतिनिधी पापा करीम बेग यांनी त्यांना मदत केली. न्यायालयासमोर आरोपीने वादातीत धनादेश कायदेशीर देण्यापूर्वी दिल्याचे सिद्ध झाल्याने न्यायालयाने आरोपी ताहीर करीम बागवान याला दोषी ठरवले.
दोषी: आरोपी बागवान याला न्यायालयाने भारतीय चलनक्षम दस्तऐवज कायदा 138 अन्वये फौजदारी प्रक्रिया संहितेचे कलम 255 (2) अन्वये दोषी ठरवत सहा महिन्याच्या कारावासाची व सत्तर हजार रुपये दंड तसेच दंडाची रक्कम न भरल्यास तीन महिने साध्या कारावासाची शिक्षा ठोठावली आहे. दंडाच्या रकमेतून कंपनीच्या धनादेशाची रक्कम कंपनीला परत करावयाची आहे.
