महाराष्ट्र संवाद न्यूज
कौटुंबिक वादातून पत्नीने संगमनेर पोलीस ठाण्यात दिलेल्या फिर्यादीचा राग मनात धरून पतीने सासुरवाडीला जात पत्नीसह मेव्हणा आणि आजी सासूची निर्घून हत्या केल्याचा प्रकार समोर आला आहे. तर सासू सासरा आणि मेहुणी यात गंभीर जखमी झाले असून त्यांच्यावर शिर्डीच्या रुग्णालयात उपचार सुरू आहे. दरम्यान स्थानिक गुन्हे शाखेच्या पोलिसांच्या मदतीने मुख्य आरोपीला नाशिक मधून ताब्यात घेण्यात आले असल्याची माहिती समोर येत आहे.
शिर्डीत घडले हत्याकांड: शिर्डीच्या सावळीविहीर गावात विलासनगरमध्ये बुधवारी रात्री अकरा वाजता हे हत्याकांड घडले. या घटनेने अहमदनगर जिल्हा हादरला असून वर्षा सुरेश निकम (वय 24 वर्ष), रोहित चांगदेव गायकवाड (वय 25 वर्ष) व हिराबाई धृपद गायकवाड (वय 70 वर्ष) अशी तिघा खून झालेल्यांची नावे असून फिर्यादी योगिता महेंद्र जाधव, चांगदेव धृपद जाधव व संगीता चांगदेव गायकवाड अशी जखमींची नावे आहेत.
गुन्हा दाखल: या संदर्भात शिर्डी पोलीस ठाण्यात आरोपी सुरेश विलास निकम व रोशन कैलास निकम (दोघे रा. संगमनेर खुर्द, ता. संगमनेर, जि. अहमदनगर) या दोघां विरोधात योगिता महिंद्र जाधव यांनी दिलेल्या फिर्यादीवरून भारतीय दंड विधान संहिता कलम 302, 307, 506, 34 अन्वये गुन्हा दाखल करण्यात आला आहे.
नेमकं काय घडलं: आरोपी सुरेश निकम याच्या पत्नीने कौटुंबिक वादातून संगमनेर पोलीस ठाण्यात फिर्याद दिली होती. या फिर्यादीचा राग मनात धरून सुरेश निकम व रोशन निकम या दोघांनी बुधवारी रात्री अकरा वाजता सावळीविर येथे आरोपीच्या सासुरवाडीला जात हातातील चाकूने मेव्हणा रोहित चांगदेव गायकवाड, पत्नी वर्षा सुरेश निकम, आजी सासू हिराबाई धृपद गायकवाड, सासरा चांगदेव गायकवाड सासू संगीता गायकवाड आणि मेहुणी योगिता महेंद्र जाधव यांच्यावर चाकूने हल्ला चढविला. यात मेव्हणा रोहित चांगदेव गायकवाड, पत्नी वर्षा सुरेश निकम, आजी सासू हिराबाई धृपद गायकवाड या तिघांचा मृत्यू झाला तर अन्य तिघे गंभीर जखमी झाले आहेत.
तपास सुरू: पोलिसांनी आरोपी पतीला ताब्यात घेतले असून पुढील तपास सुरू आहे.
