महाराष्ट्र संवाद न्यूज
संगमनेर – भूखंडाचा व्यवहार न झाल्याने तक्रारदाराला दिलेले धनादेश वटला नाही म्हणून संगमनेरच्या अतिरिक्त मुख्य न्याय दंडाधिकाऱ्यांनी आरोपीला दोषी ठरवत एक वर्ष कारावासाची शिक्षा आणि पाच लाख रुपयांच्या दंड ठोठावला. मात्र या निर्णयाविरोधात अपिलात गेलेल्या आरोपीला वरिष्ठ न्यायालयाने दंडाच्या रकमेच्या पंचवीस टक्के एक लाख रुपये पंधरा दिवसांच्या आत न्यायालयात भरण्याचे आदेश दिले. त्यानंतर या खटल्याचे कामकाज चालणार आहे.
याने घेतली वरिष्ठ न्यायालयात धाव : प्रकाश प्रभू अरगडे (रा. सुकेवाडी, ता. संगमनेर) असे शिक्षा झालेल्या व वरिष्ठ न्यायालयात या निर्णया विरोधात अपील दाखल केलेल्या आरोपीचे नाव आहे.
या न्यायालयासमोर सुनावणी : अरगडे यांच्या विरोधात प्रशांत चंद्रकांत डहाळे यांनी धनादेश अनादर प्रकरणी संगमनेरच्या न्यायालयात खटला दाखल केला होता. या खटल्याची सुनावणी अतिरिक्त मुख्य न्यायदंडाधिकारी डी. एम. गिरी यांच्यासमोर झाली होती. अतिरिक्त मुख्य न्यायदंडाधिकारी डी. एम. गिरी यांनी दिलेल्या निर्णया विरोधात प्रकाश प्रभू अरगडे यांनी वरिष्ठ न्यायालयात अपील केले असून या अपिलाची सुनावणी जिल्हा अतिरिक्त सत्र न्यायाधीश डी. एस. घुमरे यांच्यासमोर होणार आहे. तत्पूर्वी न्यायाधीश घुमरे यांनी आरोपीला एक लाख रुपये न्यायालयात भरण्याचे आदेश दिले आहेत.
हे वकील पाहतायत काम : या प्रकरणातील मूळ तक्रारदार प्रशांत चंद्रकांत डहाळे याच्यावतीने ॲड. सैफुद्दीन शेख, ॲड. सीमा काळे-सातपुते तर अपील दाखल केलेल्या आरोपीच्या वतीने ॲड. श्रीकांत गोंगे काम पहात आहेत.
काय होते प्रकरण…
मजुरीचे काम करणाऱ्या प्रशांत डहाळे यांना प्लॉट खरेदी करावयाची होती. ही बाब ओळखीतून त्यांनी आरोपी प्रकाश प्रभू अरगडे याला सांगितली. अरगडे याने त्याच्या घरासमोर असलेल्या मीरा हॉटेलजवळ सुकेवाडी (ता. संगमनेर) येथे प्लॉट विक्रीसाठी उपलब्ध असल्याचे डहाळे यांना सांगितले होते. तसेच या संदर्भातील व्यवहार करून देण्याचे अरगडे याने कबूल केले होते. मात्र अनामत देऊन देखील या प्लॉटचा व्यवहार होऊ शकला नव्हता. त्यामुळे अनामत पोटी दिलेली रक्कम डहाळे यांनी अरगडे याच्याकडे मागितली होती. आरगडे यांनी दिलेला धनादेश बँकेत न वटल्याने डहाळे यांनी अरगडे यांच्या विरोधात न्यायालयात निगोशिएबल इन्स्ट्रुमेंटस अॅक्ट कलम १३८ प्रमाणे फिर्याद दाखल केली होती. यात डहाळे यांच्यावतीने ॲड. सैफुद्दीन शेख यांनी काम बघितले. न्यायाधीश डी. एम. गिरी यांनी आरोपी प्रकाश प्रभू अरगडे याला दोषी ठरवत एक वर्षाचा साधा कारावास आणि 5,00,000/- (रु. पाच लाख रुपये) ची भरपाई देण्याचा हुकूम केला. या निर्णयाविरोधात आरोपीने जिल्हा व सत्र न्यायालयात अपील केले.
