महाराष्ट्र संवाद न्यूज
संगमनेर – अहमदनगरमध्ये झालेल्या अठराव्या जिल्हा स्पोर्ट्स व फिटनेस एरोबिक्स चॅम्पियनशीप स्पर्धेत संगमनेरच्या ध्रुव ग्लोबल स्कूलचा बोलबाला बघायला मिळाला. एरोबिक्सच्या फिटनेस आणि एरो या दोन्ही प्रकारात विविध गटात उत्कृष्ट खेळाचे प्रदर्शन करतांना ध्रुवच्या खेळाडूंनी २५ सुवर्ण व प्रत्येकी ३ रौप्य व कांस्य पदकांसह एकूण ३१ पदकांची लयलुट केली. स्पर्धेतील सर्वोत्कृष्ट कामगिरीच्या जोरावर या सर्व खेळाडूंची राज्यस्तरीय स्पर्धेसाठी निवड करण्यात आली आहे.
स्पर्धेतील १० ते १४ वर्षांखालील मुलांच्या स्पोर्ट्स एरोबिक्स गटात ध्रुव ग्लोबल स्कूलच्या ईशान उगले, शौर्य मणियार, रचित कासट यांनी सुवर्ण कामगिरी करतांना शाळेला तीन सुवर्ण पदके मिळवून दिली. रुद्र हुलवान, राजवीर आवारी आणि साईराज बालोडे यांनी रौप्य तर, ओम गणोरे, आलोक आरोटे व स्पर्श घुले यांना कांस्य पदके मिळाली. बारा वर्षांखालील मुलांच्या गटातही रचित आणि शौर्य यांनी सुवर्ण पदके मिळवतांना ध्रुव ग्लोबल स्कूलचा दबदबा कायम राखला.
अकरा वर्षांखाली मुलींच्या फिटनेस एरोबिक्स प्रकारात अनिका चांडक, गुंजल करवा, लब्धी कटारिया, रिद्धी दर्डा, त्रिषा गांधी, आराध्या जोशी आणि आलिया सोनकर यांनी सुवर्ण पदके मिळवित शाळेची सुवर्ण पताका फडकती ठेवली. याच प्रकारातील चौदा वर्षांखालील गटातही नंदिनी हुलवान, तनुश्री लहामगे, मानसी आहेर, आर्या तक्ते, मनस्वी कदम, आस्था जोशी, अस्मि वर्पे व अदिती काळे यांनी तर, एरो एरोबिक्स प्रकारात ओवी देशमुख, अक्षरा नवले, चार्वी मालुंजकर, आर्या आरोटे आणि रिद्धीमा सुलताने यांनी सुवर्ण पदकांची लयलुट केली.
जिल्हास्तरीय एरोबिक्स स्पर्धेत ध्रुव ग्लोबल स्कूलच्या स्पर्धकांनी सादर केलेल्या सर्वोत्कृष्ट प्रदर्शनाच्या जोरावर या सर्व खेळाडूंची राज्यस्तरीय स्पर्धेसाठी निवडही करण्यात आली. एरोबिक्स असोसिएशनच्या पदाधिकार्यांच्या उपस्थितीत विजेत्या स्पर्धकांचा सन्मान करण्यात आला.
क्रीडा शिक्षक कुलदीप कागडे यांनी विद्यार्थ्यांना मार्गदर्शन केले. या सुवर्ण यशाबद्दल शाळेचे चेअरमन डॉ. संजय मालपाणी, व्हा. चेअरमन गिरीश मालपाणी व प्राचार्या अर्चना घोरपडे यांनी विद्यार्थ्यांचे अभिनंदन केले.
