महाराष्ट्र संवाद न्यूज @ अनंत पांगारकर
सन 2023-24 या आर्थिक वर्षांमध्ये सर्वसाधारण लाभार्थ्यांकरिता संजय गांधी निराधार अनुदान योजनेच्या अंमलबजावणीसाठी राज्य सरकारने साडेचारशे कोटीचा निधी जिल्हाधिकाऱ्यांकडे वितरित केला आहे. या निधीतून लाभार्थ्यांना अनुदान वाटप केले जाणार असले तरी राज्यातील अहमदनगर जिल्हा आणि मुंबई शहराच्या वाट्याला एक रुपयाचाही निधी वितरित करण्यात आलेला नाही. राज्याच्या महसूलमंत्र्यांच्या जिल्ह्यातच या योजनेचे लाभार्थी निधीपासून वंचित राहण्याची चिन्हे निर्माण झाली आहे.
विधानसभा कामकाजा दरम्यान 22 ऑगस्टला मुख्यमंत्री एकनाथ शिंदे यांनी संजय गांधी निराधार योजनेच्या लाभार्थ्यांना तातडीने वेळेवर पैसे देण्याचे निर्देश दिले गेले असल्याचे सांगितले होते. त्यानंतर आता या संदर्भात शासन निर्णय झाला असून या निधीचे वाटप करण्याचे निर्देश देण्यात आले आहेत. मात्र राज्यातील निधी न मिळालेला मुंबई शहरा पाठोपाठ अहमदनगर हा एकमेव जिल्हा आहे.
#विधानसभाकामकाज
संजय गांधी निराधार योजनेच्या लाभार्थ्यांना तातडीने वेळेवर पैसे देण्याचे निर्देश देण्यात येतील- मुख्यमंत्री एकनाथ शिंदे pic.twitter.com/yoBYH32WrD— CMO Maharashtra (@CMOMaharashtra) August 22, 2022
राज्याच्या महसूल मंत्रीपदाची धुरा नगर जिल्ह्यातील भाजपचे मातब्बर नेते राधाकृष्ण विखे पाटील यांच्याकडे आहे. ते पालकमंत्री असलेल्या जिल्ह्यालाच शासनाने ठेंगा दाखविला असून संजय गांधी निराधार अनुदान योजनेत राज्यात वितरित करण्यात आलेल्या साडेचारशे कोटीच्या निधीमध्ये अहमदनगर जिल्ह्याच्या वाट्याला एक रुपयाचाही निधी मिळालेला नाही. संजय गांधी निराधार अनुदान योजनेतील सर्वसाधारण लाभार्थ्यांसाठी सन 2023-24 आर्थिक वर्षाकरिता अनुदानाचे वितरणासंबंधीचा शासन निर्णय 6 ऑक्टोंबरला काढण्यात आला आहे.
संजय गांधी निराधार योजनेसाठी नाशिक विभागाला 265260290 रुपयांचा निधी प्राप्त झाला असून हा सर्व निधी नाशिक विभागातील अहमदनगर वगळता नाशिक, धुळे, जळगाव व नंदुरबार जिल्ह्यासाठी वितरित करण्याचे आदेश देण्यात आले आहेत.
तर श्रावण बाळ सेवा राज्य निवृत्तीवेतन योजनेचाही 765 कोटी रुपयांचा निधी राज्यातील जिल्हाधिकाऱ्यांकडे वर्ग करण्यात आला आहे. यात नाशिक विभागाच्या वाट्याला 883673200 रुपये आले आहेत. यापैकी 336433800 रुपये नगर जिल्ह्याच्या वाट्याला आले आहेत. यातून श्रावण बाळ योजनेचा लाभार्थ्यांना लाभ दिला जाईल.
