महाराष्ट्र संवाद न्यूज @ अनंत पांगारकर
संगमनेर – आज मिळेल, उद्या मिळेल या आशेवर गेल्या दोन वर्षांपासून असलेल्या दूधगंगा नागरी पतसंस्थेतील ठेवीदारांचा संयम अखेर सुटला आहे. घोटाळेबाज भाऊसाहेब कुटे यांच्यासह फरार असलेल्या आरोपींना अटक करावी, ठेवीदारांच्या ठेवी परत मिळाव्यात या मागणीसाठी ठेवीदार-खातेदार शनिवारी (१४ ऑक्टोंबर) प्रांताधिकारी कार्यालयासमोर जन आक्रोश व उपोषण करणार आहे.
दुधगंगा नागरी सहकारी पतसंस्थेमध्ये ठेवीदारांच्या तब्बल ८१ कोटी रुपयांच्या रकमेचा राजकीयदृष्ट्या प्रतिष्ठित असलेल्या चेअरमन भाऊसाहेब कुटे याच्यासह त्याच्या नातेवाईक आणि अन्य काहीजणांनी अपहार केला असल्याचे समोर आले आहे. याप्रकरणी संगमनेर शहर पोलीस ठाण्यात चेअरमन व राजकीय प्रतिष्ठित असलेल्या भाऊसाहेब कुटे याच्यासह तब्बल २१ जणांविरोधात विविध कलमान्वये गुन्हा दाखल करण्यात आला आहे.
याप्रकरणी काही आरोपी अटकेत असून काही जणांना जामीन मंजूर झाला आहे. तर यातील मुख्य आरोपी असलेल्या भाऊसाहेब कुटे याच्यासह त्याच्या कुटुंबीयांचा अटकपूर्व जामीन अर्ज संगमनेरच्या जिल्हा व सत्र न्यायालयाने फेटाळला असून कुटे आपल्या कुटुंबीयांसह, व गुन्ह्यातील अन्य राजकीय आशीर्वाद असलेले आरोपी अद्यापही बाहेर आहेत.
गुन्हा दाखल होऊन तब्बल दोन महिन्याचा कालावधी उलटत आला असला तरी तपास यंत्रणाचे हात अद्याप या राजकीय प्रतिष्ठित आरोपींपर्यंत पोहोचू शकलेले नाही यामुळे बँकेच्या ठेवीदार सभासद संभ्रमाचे वातावरण निर्माण झाले आहे.
त्यामुळे या विरोधात आता एकवटलेल्या दूधगंगा नागरी पतसंस्था ठेवीदार संघर्ष समितीने शनिवारी जन आक्रोश आंदोलन व उपोषण करण्याचा निर्णय घेतला आहे. या संदर्भातील निवेदन संघर्ष समितीच्या वतीने प्रांताधिकारी शैलेश हिंगे यांच्यासह संबंधित अधिकाऱ्यांना देण्यात आले आहे.
