महाराष्ट्र संवाद न्यूज
संगमनेर : हजारो शेतकऱ्यांच्या अन्नाशी निगडित असलेल्या आणि संगमनेरची कामधेनु म्हणून ओळखल्या जाणाऱ्या सहकार महर्षी भाऊसाहेब थोरात सहकारी साखर कारखान्याच्या गळीत हंगामाचा शुभारंभ गुरुवारी (ता. २ नोव्हेंबर) सकाळी १० वाजता काँग्रेसचे ज्येष्ठ नेते, माजी मंत्री, आमदार बाळासाहेब थोरात व त्यांच्या पत्नी कांचनताई यांच्या हस्ते तर माजी आमदार डॉ. सुधीर तांबे यांच्या प्रमुख उपस्थितीत होत असल्याची माहिती देण्यात आली.
कारखान्याचे अध्यक्ष बाबा ओहोळ कार्यक्रमाच्या अध्यक्षस्थानी असतील. माजी मंत्री आमदार बाळासाहेब थोरात यांच्या नेतृत्वाखाली कार्यरत असलेला सहकार महर्षी भाऊसाहेब थोरात सहकारी साखर कारखाना ऊस उत्पादक शेतकऱ्यांना सर्वाधिक भाव देणारा अग्रगण्य कारखाना म्हणून ओळखला जातो. दिवंगत नेते भाऊसाहेब थोरात यांची कडवी शिस्त, काटकसर, पारदर्शकता व उत्कृष्ट व्यवस्थापन आणि आमदार बाळासाहेब थोरात यांच्या कुशल मार्गदर्शनामुळे या साखर कारखान्याने देशात आदर्श निर्माण केला आहे.
हे वर्ष स्वातंत्र्य सेनानी सहकार महर्षी भाऊसाहेब थोरात यांचे जन्मशताब्दी वर्ष असून या वर्षानिमित्त अमृत उद्योग समूहात विविध उपक्रमांचे आयोजन करण्यात आले आहे. दीपावलीनिमित्त कारखान्याच्या सभासदांना प्रत्येकी पंधरा किलो मोफत साखरेचे वाटप कारखाना येथे सुरू आहे.
गुरुवारी होणाऱ्या या ऊस गळीत हंगाम शुभारंभ प्रसंगी आमदार सत्यजित तांबे, बाजीराव खेमनर, माधवराव कानवडे, दुर्गाताई तांबे, रणजितसिंह देशमुख, इंद्रजित थोरात, डॉ. जयश्री थोरात, उद्योगपती राजेश मालपाणी, अजय फटांगरे, ॲड. सुहास आहेर, सोमेश्वर दिवटे, प्रा. बाबा खरात, निखील पापडेजा आदींसह विविध संस्थांचे पदाधिकारी उपस्थित राहणार आहे.
कार्यक्रमासाठी सर्व सभासद, ऊस उत्पादक व शेतकरी बांधवांनी मोठ्या संख्येने उपस्थित राहण्याचे आवाहन कारखान्याचे कार्यकारी संचालक जगन्नाथ घुगरकर यांनी केले आहे.
