महाराष्ट्र संवाद न्यूज
संगमनेर : काँग्रेस नेते आमदार बाळासाहेब थोरात यांच्या मार्गदर्शनाखाली कार्यरत असलेल्या संगमनेर तालुका दूध उत्पादक संघाने (राजहंस दूध) दीपावलीच्या अगोदरच दूध दर फरक, दुधाचे पेमेंट, दूध वाहतूक ठेकेदारांचे पेमेंट, अनामत, कामगारांचा बोनस, मेहनताना, पगार, व्यापारी देणे, चढ-उतार निधी असे एकूण 35.66 कोटी रुपये संबंधितांच्या खात्यावर बँकेत वर्ग करण्यात आल्याची माहिती दूध संघाचे अध्यक्ष रणजीतसिंह देशमुख यांनी दिली.
देशमुख म्हणाले, थोर स्वातंत्र्य सेनानी सहकार महर्षी भाऊसाहेब थोरात यांच्या आदर्श तत्त्वावर आमदार थोरात यांच्या मार्गदर्शनाखाली वाटचाल करणाऱ्या राजहंस दूध संघाच्या माध्यमातून संगमनेर तालुक्याची ग्रामीण अर्थव्यवस्था मजबूत झाली. दूध संघाच्या माध्यमातून सातत्याने शेतकरी व नागरिकांना मदत करण्यात आली. थोरात यांच्याच मार्गदर्शनाखाली कार्यरत असलेल्या अमृत उद्योग समूहाच्या माध्यमातून दरवर्षी दीपावली निमित्त शेकडो कोटी रुपये संबंधितांच्या बँक खात्यावर वर्ग केले जातात. या माध्यमातून बाजारामध्ये शेकडो कोटी रुपयांची उलाढाल होत असते.
सहकार महर्षी भाऊसाहेब थोरात यांचे हे जन्मशताब्दी वर्ष असून यावर्षी दूध उत्पादक व कामगारांची दिवाळी गोड करण्याचा प्रयत्न करण्यात आला आहे. राजहंस दूध संघाकडून दरवर्षी चांगल्या प्रतीच्या दूध पुरवठ्यावर दूध उत्पादकांना जास्तीत जास्त दूध दर फरक अदा करण्यात येतो. तब्बल 35.66 कोटी रुपये बँक खात्यावर वर्ग करण्यात आल्याने दूध उत्पादक, दूध वाहतूक ठेकेदार, कामगार व व्यापारी वर्गामध्ये आनंदाचे वातावरण निर्माण झाले आहे.
दूध संघाची मागील वर्षाची उलाढाल 530.38 कोटी रुपयांची झाली, ही संगमनेर तालुक्यातील सहकारासाठी अत्यंत अभिमानाची बाब आहे.
पैसे संबंधितांच्या बँक खात्यावर वर्ग करण्याच्या निर्णयावेळी अध्यक्ष रणजितसिंह देशमुख, उपाध्यक्ष राजेंद्र चकोर, संचालक लक्ष्मणराव कुटे, आर. बी. राहणे, विलासराव वर्पे, भास्करराव सिनारे, संतोष मांडेकर, विलास कवडे, बबनराव कुऱ्हाडे, बादशहा वाळुंज, संजय पोकळे, विक्रम थोरात, विष्णू ढोले, तुकाराम दातीर, रवींद्र रोहम, भारत मुंगसे, डॉ. प्रमोद पावसे, प्रतिभा जोंधळे, मंदा नवले, कार्यकारी संचालक डॉ. सुजित खिलारी, जनरल मॅनेजर गणपत शिंदे आदी उपस्थित होते.
