महाराष्ट्र संवाद न्यूज
मुंबई : केंद्र शासनाच्या आयुष्यमान भारत प्रधानमंत्री जन आरोग्य योजना व राज्य सरकारच्या महात्मा ज्योतिराव फुले जन आरोग्य योजनेच्या एकत्रित अंमलबजावणीसाठी केंद्रात असलेल्या डॉ. ओमप्रकाश शेटे यांना पुन्हा महाराष्ट्रात बोलाविण्यात आले आहे.
डॉ. शेटे यांच्याकडे राज्यातल्या आरोग्य व्यवस्थेमध्ये सुसूत्रता व सुधारणा करण्यासाठी या नवीन अभियानाची धुरा देण्यात आल्याचं समजते. डॉ. शेटे हे राज्याचे मुख्यमंत्री देवेंद्र फडणवीस यांचे विश्वासू समजले जातात. मुख्यमंत्री वैद्यकीय सहाय्यता कक्ष व केंद्रीय आरोग्य राज्यमंत्र्यांचे सहाय्यक खासगी सचिव राहिलेल्या डॉ. शेटे यांनी तत्कालीन भाजप-शिवसेना सरकारच्या कार्यकाळात मुख्यमंत्री वैद्यकीय सहाय्यता कक्षाच्या माध्यमातून फडणवीस सरकारची प्रतिमा घराघरात पोहोचविण्याचे काम केले होते.
दिवस-रात्र काम करत साडेचार वर्षाच्या कार्यकाळात डॉ. शेटे यांनी राज्याच्या इतिहासातील सर्वात जास्त निधी सर्वसामान्य रुग्णांच्या उपचारासाठी पोहोचविण्याचे काम केले होते. तत्कालीन मुख्यमंत्री देवेंद्र फडणवीस यांचा रुग्णसेवेचा संदेश घेऊन राज्यभर आरोग्य शिबिरे भरवली होती. अतिशय दुर्गम व नक्षलग्रस्त भागात सरकारची रुग्णसेवा पोहोचवली होती.
तत्कालीन मुख्यमंत्री वैद्यकीय सहाय्यता कक्षाचे प्रमुख राहिलेले डॉ. शेटे सध्या केंद्र सरकारच्या आरोग्य मंत्रालयामध्ये सहाय्यक सचिव म्हणून कार्यरत आहेत. मुख्यमंत्री वैद्यकीय सहायता कक्षात असताना धर्मादाय व महात्मा ज्योतिबा फुले जन आरोग्य योजनेचे सदस्य म्हणून देखील त्यांनी काम पाहिलेलं आहे.
त्यांच्या कार्यकाळामध्ये मुख्यमंत्री वैद्यकीय सहायता व धर्मादाय किंवा महात्मा फुले योजनेतील लाभार्थ्यांना आरोग्य उपचाराच्या दृष्टीने मोठा लाभ झाला आहे. डॉ. शेटे यांनी 2014 ते 2019 या कार्यकाळात सामान्य माणूस केंद्रबिंदू मानून पैशाअभावी किंवा उपचाराअभावी सामान्य माणसाचा जीव जाता कामा नये, हा देवेंद्र फडणवीस यांचा संदेश राज्यातल्या कानाकोपऱ्यापर्यंत नेला.
त्यांची खासियत म्हणजे सर्वपक्षीय संबंध, कोणताही पक्षीय भेदाभेद न करता, कुठलीही शिफारस न घेता प्राणाणिकपणे काम करणे. सर्वसामान्य रुग्णांना जात, धर्म,पंथ विरहित न्याय देण्याचा प्रयत्न त्यांच्या कार्यकाळात झाला. त्यामुळेच त्यांनी राज्यभरात देवदूत म्हणून ओळख आहे. शेटे यांच्याकडून सर्वसामान्य व गरजवंत रुग्णांच्या खूप मोठ्या अपेक्षा आहेत.
