महाराष्ट्र संवाद न्यूज
संगमनेर : आपल्या दिशादर्शक कामातून राज्यातील सहकारी साखर कारखानदारीसाठी मापदंड ठरलेल्या सहकार महर्षी भाऊसाहेब थोरात सहकारी साखर कारखान्याच्या 57 व्या गळीत हंगामात उत्पादित झालेल्या पहिल्या साखर पोत्याचे पूजन रविवारी (ता. 5 नोव्हेंबर) माजी मंत्री काँग्रेसचे ज्येष्ठ नेते आमदार बाळासाहेब थोरात यांच्या हस्ते दुपारी साडेचार वाजता करण्यात येणार आहे. अशी माहिती कारखान्याचे कार्यकारी संचालक जगन्नाथ घुगरकर यांनी दिली.
कारखान्याचे अध्यक्ष बाबा ओहोळ या कार्यक्रमाच्या अध्यक्षस्थानी राहणार असून नाशिक पदवीधर मतदारसंघाचे माजी आमदार डॉ. सुधीर तांबे यावेळी प्रमुख पाहुणे म्हणून उपस्थित राहणार आहे. यावेळी आमदार सत्यजित तांबे, बाजीराव खेमनर, माधवराव कानवडे, दुर्गाताई तांबे, रणजीतसिंह देशमुख, सुधाकर जोशी, रामहरी कातोरे, इंद्रजीत थोरात आदींसह विविध संस्थांचे पदाधिकारी उपस्थित राहणार आहेत.
आमदार थोरात यांच्या मार्गदर्शनाखाली थोरात कारखान्याने यावर्षी 2835 रुपये उच्चांकी भाव दिला. मराठा आरक्षणाच्या पार्श्वभूमीवर गळीत हंगामाचा शुभारंभ अत्यंत साध्या पद्धतीने झाला. रविवारी होत असलेल्या कार्यक्रमासाठी सभासद, ऊस उत्पादक शेतकरी, पदाधिकारी कार्यकर्त्यांनी मोठ्या संख्येने उपस्थित राहण्याचे आवाहन संचालक मंडळाच्यावतीने करण्यात आले आहे.
