महाराष्ट्र संवाद न्यूज
संगमनेर : तीन महिने पीडितेवर अनैसर्गिक शरीर संबंध केल्याचा तसेच शरीर संबंधाचे आक्षेपार्ह फोटो काढून ते व्हायरल करण्याची धमकी दिल्याचा आरोप असणाऱ्या आरोपीच्या अटकपूर्व जामीन अर्ज संगमनेरच्या जिल्हा व अतिरिक्त सत्र न्यायालयाने मंजूर केला आहे.
पहिला विवाह लपवून ठेवत पीडित महिलेसोबत दुसरा विवाह करून तीन महिने अनैसर्गिक शारीरिक संबंध करून तिचा मानसिक व शारीरिक छळ केला. शरीर संबंधाचे आक्षेपार्ह फोटो काढून ते व्हायरल करण्याची धमकी दिली असा आरोप करत पीडित महिलेने संगमनेर तालुक्यातील आरोपी विरोधात सांगवी (पुणे) पोलीस स्टेशन येथे तक्रार दाखल केली होती.
पीडित महिलेने सांगवी पोलीस ठाण्यात केलेल्या तक्रारीचा हा गुन्हा संगमनेर शहर पोलिसांकडे वर्ग करण्यात आला होता. शहर पोलीस स्टेशनचे पोलीस उपनिरीक्षक दाभाडे या प्रकरणी तपास करत आहे.
या संदर्भात आरोपीने अटकपूर्व जामीन मिळण्यासाठी संगमनेरच्या जिल्हा अतिरिक्त सत्र न्यायालयात ॲड. शरीफ पठाण यांच्यामार्फत अर्ज दाखल केला होता. जिल्हा व सत्र न्यायाधीश वाय. एच. अमेठा यांच्या न्यायालयासमोर या जामीन अर्जाची सुनावणी झाली.
सुनावणी दरम्यान आरोपीच्या वकिलांनी अर्जदार आरोपी निर्दोष असल्याचे न्यायालयाला सांगितले. त्याने पूर्वीचे लग्न लपवून पिडीतेसोबत कोणतेही गैरकृत्य केल्याचे बाब स्पष्टपणे नाकारली. तसेच आरोपीने पिडीतेचे कोणतेही आक्षेपार्ह फोटो काढले नसल्याचा युक्तीवाद केला. पिडीतेला केवळ आरोपीच्या मुलाचा सांभाळ करण्यासाठी कामास ठेवले होते. दरम्यान काही दिवसांपूर्वी आरोपीच्या घरातून रोख रक्कम गायब झाली, त्याची चौकशी आरोपीने फिर्यादीकडे केली असता फिर्यादीवरच गुन्हा दाखल होईल या भीतीने तिने आरोपी विरुद्ध खोटी फिर्याद दाखल केल्याचा युक्तिवाद केला.
सरकार पक्ष, पीडित महिला आणि आरोपीचे वकील या सर्वांचे म्हणणे ऐकल्यानंतर जिल्हा व सत्र न्यायाधीश वाय. एच. अमेठा यांनी आरोपीचा अटकपूर्व जामीन अर्ज मंजूर केला.
