महाराष्ट्र संवाद न्यूज
संगमनेर – बँक ऑफ बडोदाच्या खातेदाराला ऑनलाईन 32,897/- रुपयांना गंडा गंडा घातल्याचा प्रकार संगमनेरमध्ये समोर आला आहे. या संदर्भात संगमनेर तालुका पोलीस ठाण्यात अज्ञात व्यक्ती विरोधात गुन्हा दाखल करण्यात आला आहे.
संगमनेर तालुक्यातील निमगाव भोजापुर येथील किरण दगडू सोनवणे यांचे संगमनेर मधील बँक ऑफ बडोदामध्ये 2011 पासून खाते असून या खात्यावर त्यांचे शेतीचे पैसे येत असतात. 23 सप्टेंबरला त्यांच्या बँक खात्यावर 32,897/- रुपये बॅलन्स होता.
24 ऑक्टोंबर रोजी त्यांच्या मोबाईलवर बँकेच्या मेसेज आला. या मेसेज द्वारे त्यांना त्यांच्या बँक खात्यातून 32,897/- रुपये दुसऱ्याच्या यूपीआय नंबरवर ट्रान्सफर केल्याचे व खात्यावर 70 पैसे एवढा बॅलन्स शिल्लक राहिल्याचे दिसून आले. त्यामुळे त्यांनी बँकेत जाऊन संबंधित व्यवहाराचे स्टेटमेंट काढले असता त्यांना 24 ऑक्टोबरला सकाळी सव्वा आठ वाजण्याच्या सुमारास एका खात्यावर यूपीआय नंबरने हे रक्कम ट्रान्सफर झाल्याचे दिसून आले.
त्यामुळे सोनवणे यांनी बँकेच्या अधिकाऱ्यांकडे चौकशी केली असता त्यांच्याकडून समाधानकारक माहिती मिळू शकली नाही. त्यामुळे ऑनलाईन फसवणूक झाल्याचे लक्षात आल्याने सोनवणे यांनी संगमनेर तालुका पोलीस ठाण्यात अज्ञात व्यक्ती विरोधात दिलेल्या तक्रारीवरून फसवणुकीचा गुन्हा दाखल करण्यात आला आहे. पुढील तपास तालुका पोलीस करत आहे.
