महाराष्ट्र संवाद न्यूज
रात्रीच्या वेळी संशयास्पद अवस्थेत फिरताना ताब्यात घेतलेल्या दोघा संशयित आरोपींना सुट्टीकालीन न्यायालयासमोर नेण्यासाठी अर्धा तासाचा उशीर करणाऱ्या पोलीस हवालदार आणि हेड कॉन्स्टेबलला शिस्तभंगाचा ठपका ठेवत न्यायालयाने शिक्षा सुनावली. दोन्ही पोलीस कर्मचाऱ्यांना परिसरातील गवत छाटण्याची शिक्षा देण्यात आली.
परभणी जिल्ह्यातील मानवत पोलीस ठाण्यातील हे दोघे पोलीस कर्मचारी रविवारी रात्री २२ ऑक्टोंबरला रात्रीच्या गस्तीवर होते. पहाटेच्या वेळी या दोघा कर्मचाऱ्यांनी मानवत येथे दोघाजणांना संशयास्पद रित्या फिरताना ताब्यात घेत त्यांना अटक केली होती. अटकेतील या दोन्ही संशयित आरोपींना सकाळी ११ वाजता सुट्टी कालीन न्यायालयासमोर हजर करण्यात येणार होते.
मात्र संशयित दोघा आरोपींसह हे दोन्ही कर्मचारी सकाळी साडेअकरा वाजण्याच्या सुमारास न्यायालयात पोहोचले. न्यायालयाचा रोष ओढून घेतलेल्या या दोन्ही पोलीस कर्मचाऱ्यांना न्यायालयाने परिसरातील गवत कापण्याचे आदेश दिले.
न्यायालयाने आयुष्यभर लक्षात राहील अशी शिक्षा दिल्याने या शिक्षेमुळे अस्वस्थ झालेल्या हवालदारांनी ही बाब त्यांच्या वरिष्ठांना कळविल्यानंतर याची स्टेशन डायरीमध्ये नोंद करण्यात आली. घटनेचे साक्षर असलेल्या अन्य तीन हवालदारांचेही जबाब नोंदविण्यात आले आहे. आणि त्या संदर्भातील अहवाल वरिष्ठांना पाठविण्यात आला. परभणीच्या पोलीस अधिकाऱ्यांनी या घटनेला दुजोरा दिला असला तरी या संदर्भातील अधिक तपशील देण्यास नकार दिला.
