महाराष्ट्र संवाद न्यूज
अकोले (अहमदनगर) -अकोले तालुक्यातील सिरीयल किलर म्हणून परिचित असलेल्या क्रूरकर्मा अण्णा वैद्य याने अल्पवयीन मुलीची छेड काढत तिला मारहाण केल्याच्या कारणावरून जमावाने केलेल्या हल्ल्यामध्ये त्याचा मृत्यू झाला.
रविवारी (दि. १० डिसेंबर) सायंकाळी अकोले तालुक्यातील सुगाव खुर्द येथे ही घटना घडली. चार महिलांच्या खून प्रकरणानंतर क्रूरकर्मा म्हणून राज्यात परिचित असलेल्या मच्छिंद्र उर्फ अण्णासाहेब मुक्ताजी वैद्य (अण्णा वैद्य) याने रविवारी सायंकाळी सुगाव खुर्द गावातील एका अल्पवयीन मुलीची छेड काढत तिला बेदम मारहाण केली होती या मारहाणीत घाबरलेली मुलगी जखमी झाली असून तिच्यावर उपचार सुरू आहे. या घटनेमुळे संतप्त झालेल्या जमावाने अण्णा वैद्य याच्यावर हल्ला करत त्याला बेदम मारहाण केली.
घटनेची माहिती मिळाल्यानंतर अकोले पोलिसांनी वैद्य याला उपचारासाठी सुरुवातीला अकोले व नंतर संगमनेर येथील रुग्णालयात हलविण्यात आले. रात्री वैद्यकीय अधिकाऱ्यांनी त्याला मृत घोषित केले असल्याची माहिती पोलिसांनी दिली.
एका केबल चोरी प्रकरणात गावकऱ्यांनी त्याला पोलिसांच्या ताब्यात दिल्यानंतर त्याच्या शेतात घेतलेल्या शोध मोहिमेमध्ये चार महिलांचे सांगाडे सापडल्यानंतर हे साखळी खून प्रकरण उघडकीस आले वैद्य याने या चार महिलांचा खून करून त्यांचे मृतदेह आपल्या शेतात पुरून ठेवण्याचा प्रकार समोर आल्यानंतर राज्यभरात खळबळ उडाली होती.
चार महिलांचा खून करून त्यांचे मृतदेह शेतात पुरून ठेवल्याच्या आरोपावरून वैद्य याच्या विरोधात संगमनेरच्या जिल्हा न्यायालयात खटला दाखल करण्यात आला होता. वैद्य याला एका महिलेच्या खून प्रकरणी संगमनेरच्या जिल्हा न्यायालयाने ठोठावलेली जन्मठेपेची शिक्षा उच्च न्यायालयात रद्द करण्यात आली होती. तर अन्य खून प्रकरणांमध्ये त्याची निर्दोष करण्यात आली होती.दुसऱ्या एका खून प्रकरणात न्यायालयाने त्याचे निर्दोष मुक्तता केली होती. तुरुंगातून सुटल्यानंतर वैद्य आपल्या गावी सुगाव खुर्द येथे राहत होता.
रविवारी सायंकाळी त्याने एका अल्पवयीन मुलीची छेड काढत तिला मारहाण केल्याचा प्रकार समोर आल्यानंतर त्याला जमावाने मारहाण केली. जमावाच्या मारहाणीमध्ये जखमी झालेल्या वैद्य याला रात्री साडेआठ वाजण्याच्या सुमारास उपचारासाठी संगमनेरमध्ये आणण्यात आले होते, मात्र त्याचा मृत्यू झाल्याचे वैद्यकीय अधिकाऱ्यांनी सांगितले.
