महाराष्ट्र संवाद न्यूज
अहमदनगर -शेत जमीन खरेदीची नोंद आणि मिळकतीचे हक्क सोड नोंद करण्यासाठी ५० हजार रुपये लाच मागणाऱ्या तलाठी मॅडमसह लाच स्वीकारणाऱ्या त्यांच्या खासगी मदतनीसाला अहमदनगरच्या अँटी करप्शनने पकडत त्यांच्या विरोधात गुन्हा दाखल केला आहे.
निकिता जितेंद्र शिरसाठ (वय ४६ वर्ष) असे महिला तलाठी मॅडमचे नाव असून संकेत रणजीत ससाने (वय २६ वर्ष) हा त्यांचा खासगी मदतनीस असून या दोघांविरोधात अहमदनगरच्या एमआयडीसी पोलीस ठाण्यात गुन्हा दाखल करण्यात आला आहे.
लाचेची तक्रार करणाऱ्या तक्रारदाराची अहमदनगरच्या मौजे शेंडी गावामध्ये शेतजमीन खरेदीची नोंद करण्यासाठी व इतर तीन गटातील वडिलोपार्जित मिळकतीची हक्क सोड नोंद करण्यासाठी शेंडीच्या तलाठी श्रीमती निकिता शिरसाठ यांनी तक्रारदाराकडे ५० हजार रुपये लाचेची मागणी केली असल्याची तक्रार अहमदनगरच्या लाचलूचपत विभागाकडे नोंदविण्यात आली होती. लाचलूचपत विभागाने लगेचच तक्रारीची पडताळणी केली असता तलाठी शिरसाठ यांनी लाचेची रक्कम त्यांचे खासगी मदतनीस संकेत ससाणे याच्याकडे देण्यास सांगितले.
पोलीस उपाधीक्षक प्रवीण लोखंडे यांच्या मार्गदर्शनाखाली पोलीस निरीक्षक राजू आल्हाट, पोलीस निरीक्षक शरद गोर्डे यांच्या नेतृत्वाखाली पोलीस नाईक राधा खेमनर, पोलीस कॉन्स्टेबल बाबासाहेब कराड, रवींद्र निमसे हेड कॉन्स्टेबल दशरथ लाड व चालक हरून शेख यांनी आरोपीला पकडण्यासाठी सापळा रचला.
नगर-छत्रपती संभाजी नगर रस्त्यावर असलेल्या भोसले अमृततुल्य नाष्टा सेंटर येथे तक्रारदाराकडून लाचेची रक्कम स्वीकारताना आरोपी संकेत ससाणे याला सोमवारी (दि. ११ डिसेंबर) रंगेहात पकडण्यात आले. रात्री दोन्ही आरोपीविरोधात अहमदनगरच्या एमआयडीसी पोलीस ठाण्यात गुन्हा दाखल करण्यात आला आहे.
