महाराष्ट्र संवाद न्यूज
संगमनेर – प्रसिद्ध वकील शरिफखान पठाण यांच्यासह त्यांच्या नातेवाईकांवर झालेल्या प्राणघातक हल्ल्यानंतर आता या गुन्ह्यातील जखमी आरोपीच्या तक्रारीवरून पठाण यांच्यासह आठ जणांवर जीवे मारण्याच्या प्रयत्नासह विविध कलमांखाली संगमनेर शहर पोलीस ठाण्यात शनिवारी दुपारी गुन्हा दाखल करण्यात आला आहे. त्यामुळे परस्पर विरोधी तक्रारीवरून दोन्ही गटातील लोकांविरोधात आता गुन्हे दाखल करण्यात आले आहे.
शरीफ पठाण, रिजवान पठाण, आसिफ पठाण, शफीक पठाण, फारुक पठाण, फरहान पठाण, आवेज मोमीन (तब्या) व तला शेख अशी गुन्हा दाखल झालेल्या आरोपींची नावे आहेत.
शुक्रवारी संध्याकाळी जुन्या भांडणाच्या कारणातून वकील शरीफ पठाण यांच्यासह त्यांच्या दोघा भावांवर हल्ल्याचा प्रकार घडला होता. आता या हल्ल्यातील विरोधी गटातील जखमी आयान सादिक शेखच्या जबाबानंतर पोलिसांनी वरील आरोपी विरोधात हा गुन्हा दाखल केला आहे.
फिर्यादीत आयान सादिक शेख याने म्हटले आहे की, कुरण रोडवर शुक्रवारी सायंकाळी साडेसहा वाजेच्या सुमारास वरील आरोपींनी संगनमताने एकत्र येत वडील सादिक शेख यांना तुमची जागा अतिक्रमणाची आहे मी वकील आहे मी तुला मारून टाकले तरी माझी कोणीही वाकडे करू शकत नाही असे म्हणत शिवीगाळ करत लाकडी काठी, गज, लोखंडी गज, पाईप, स्टंप याने मारहाण केली.
