महाराष्ट्र संवाद न्यूज
नागपूर – संगमनेर तालुक्यातून जाणाऱ्या नाशिक-पुणे राष्ट्रीय महामार्गावर अपघातांचे प्रमाण वाढले आहे. त्यामुळे अपघातातील जखमींना तात्काळ उपचार मिळावेत. यासाठी डोळासने येथे ट्रॉमा केअर सेंटर सुरू करावे, अशी मागणी नाशिक पदवीधर मतदारसंघाचे आमदार सत्यजित तांबे यांनी विधान परिषदेत केली आहे.
नागपूर येथे सुरू असलेल्या हिवाळी अधिवेशनात अपघाताबाबत सरकारचे लक्ष वेधताना आमदार सत्यजित तांबे म्हणाले की, शिर्डी येथून आळंदी वारीसाठी जात असलेल्या वारकऱ्यांच्या दिंडीला पुणे-नाशिक राष्ट्रीय महामार्गावरील खंदरमाळ येथे नुकताच अपघात झाला असून यामध्ये चार वारकऱ्यांचा दुर्दैवी मृत्यू झाला तर दहा वारकरी जखमी झाले.
घारगाव-संगमनेर दरम्यान डोळासने हे मध्यवर्ती सेंटर असून या ठिकाणी ट्रॉमा केअर सेंटर सुरू केले असते. तर कदाचित त्या वारकऱ्यांचा जीव वाचला असता. अपघात झाल्यानंतर काँग्रेस पक्षाचे नेते, आमदार बाळासाहेब थोरात यांच्या मार्गदर्शनाखाली कार्यकर्त्यांनी तातडीने या सर्वांना मदत केली. महामार्गावर वाहतुकीचे प्रमाण मोठ्या प्रमाणात आहे. यामुळे सातत्याने अपघाताचे प्रमाणही वाढले आहे.
महामार्गासह इतर गावांमधील जाणाऱ्या रोडवरही छोटे-मोठे अपघात होत असतात. हे अपघात झाल्यानंतर जखमींना आळेफाटा किंवा संगमनेर या ठिकाणी घेऊन जावे लागते. यामुळे खूप वेळ लागतो. म्हणून अपघातानंतर जखमींना तातडीने उपचार मिळावा याकरता डोळासने येथे ट्रॉमा केअर सेंटर सुरू करणे अत्यंत गरजेचे आहे. यामुळे अनेकांचे जीव वाचतील व अपघातात जखमी झालेल्या नागरिकांना तात्काळ उपचार मिळेल.
आरोग्याच्या महत्त्वाच्या मागणीसाठी कांबळे यांनी अधिवेशनात सरकारचे लक्ष वेधल्याने पठार भागातील अनेक नागरिक व युवक कार्यकर्त्यांनी आमदार तांबे यांचे आभार मानले आहे.
