महाराष्ट्र संवाद न्यूज
संगमनेर – नगरपरिषद प्रशासनाने शहरातील घरांच्या संकलित करामध्ये दहा टक्के दरवाढ प्रस्तावित केली आहे. ही दरवाढ अन्यायकारक असून महागाई, बेरोजगारी व व्यापार मंदीच्या काळात नागरिकांना परवडणारी नाही. त्यामुळे प्रस्तावित करण्यात आलेली ही दरवाढ तातडीने रद्द करावी, अशी मागणी काँग्रेस नेते आमदार बाळासाहेब थोरात व नाशिक पदवीधर मतदारसंघाचे आमदार सत्यजित तांबे यांनी सरकारकडे केली. यामुळे वाढीव दरवाढीस स्थगिती मिळण्याची चिन्हे असून यामुळे शहरवासीयांना दिलासा मिळणार आहे.
या संदर्भात थोरात म्हणाले, संगमनेर नगर परिषद हद्दीत संकलित कर आकारणीबाबत चतुर्थ वार्षिक रिविजन पूर्ण झाली असून सन २०२३-२४ या वर्षासाठी प्राथमिक कर निर्धारण करण्यात आले आहेत. यात शहरातील घरांच्या संकलित करात दहा टक्के दरवाढ प्रस्तावित केलेली आहे .सदरची दरवाढ ही अत्यंत अन्यायकारक नागरिकांना परवडणारी नाही. याबाबत संगमनेरमधील नागरिकांमध्ये असंतोष असून ही दरवाढ तातडीने मागे घ्यावी, याकरता संगमनेर शहर काँग्रेसच्यावतीने आंदोलन करत निवेदन देण्यात आले होते.
मात्र याबाबत प्रशासनाने अद्याप कोणतीही कार्यवाही केलेली नाही. तरी सरकारने तातडीने महागाई व आर्थिक टंचाईमध्ये सर्वसामान्य नागरिकांना दिलासा देण्यासाठी वाढ केलेली दरवाढ तातडीने रद्द करण्याच्या सूचना द्याव्यात अशी मागणी केली. आमदार सत्यजित तांबे यांनीही या कामी प्रशासनाकडे सातत्याने पाठपुरावा केला असून संगमनेरमधील नागरिकांना प्रस्तावित दरवाढ परवडणारी नसून आर्थिक कुचंबना करणारी आहे. त्यामुळे त्वरित दरवाढ रद्द झाली पाहिजे यासाठी प्रशासन दरबारी पाठपुरावा केला आहे.
नगरपरिषद प्रशासनाकडून घरपट्टीमध्ये दहा टक्के दरवाढ प्रस्तावित केल्यानंतर लगेचच ही अन्यायकारक दरवाढ रद्द करावी याकरता माजी आमदार डॉ. सुधीर तांबे व माजी नगराध्यक्ष दुर्गाताई तांबे यांनीही पाठपुरावा केला. शहर काँग्रेसच्यावतीने याबाबत निवेदनही देण्यात आले होते. यावेळी माजी नगराध्यक्ष दिलीप पुंड, किशोर पवार, गजेंद्र अभंग, शहराध्यक्ष सोमेश्वर दिवटे, संतोष कोळपकर, प्रवीण वरपे, रवींद्र ताजने, बाळासाहेब पवार, राजेंद्र निराळी, अरुण हिरे, ज्ञानेश्वर नाईक, सतीश मणियार, शैलेश कलंत्री, नूरमोहम्मद शेख आदींसह विविध पदाधिकारी उपस्थित होते.
