महाराष्ट्र संवाद न्यूज
धुळे – शालेय विद्यार्थी सनी साळवे यांच्या खून प्रकरणात धुळे न्यायालयाने चार आरोपींना जन्मठेपेची शिक्षा ठोठावली तर उर्वरित तिघांची निर्दोष मुक्तता करण्यात आली आहे. विशेष म्हणजे जातीय अत्याचार प्रतिबंधक कायद्यानुसार झालेली ही जन्मठेपेची राज्यातील पहिलीच ऐतिहासिक घटना असल्याचे सांगण्यात येत आहे.
धुळ्यातील देवपूर भागात २०१८ मध्ये झालेल्या सशस्त्र हल्ल्यात सनी साळवे याचा खून करण्यात आला होता. देवपूरमधील नरसिंह बियर बार जवळ गाडीला कट मारल्याच्या कारणातून झालेल्या वादात सनी साळवे, सुमेध सूर्यवंशी आणि सागर साळवे यांना बेदम मारहाण करण्यात आली होती. त्यानंतर जखमींना उपचारासाठी रुग्णालयात दाखल करण्यात आले होते.
आरोपींनी रुग्णालयातही जाऊन जखमींना धमकावण्याचा प्रयत्न केला. या मारहाणीत सनी साळवे या पंधरा वर्षे वयाच्या विद्यार्थ्यांचा मृत्यू झाला होता. सनी साळवे यांच्या हत्या प्रकरणी धुळे सत्र न्यायालयात सुरू असलेल्या खटल्याचा अंतिम निकाल न्यायाधीश डी. एम. अहिरे यांनी जाहीर केला.
आरोपींपैकी जितू फुलपगारे (वय २२ वर्ष), दीपक फुलपगारे (वय २१ वर्षे), मयूर उर्फ गुड्ड्या फुलपगारे (वय २५ वर्ष) आणि वैभव गवळे (वय २० वर्ष, सर्व रा. देवपूर, धुळे) या चौघा जणांना जातीय अत्याचार प्रतिबंधक कायद्यानुसार दुहेरी जन्मठेपेची शिक्षा सुनावण्यात आली. शिवाय दहा हजार रुपयांचा दंड आणि दंड न भरल्यास एक वर्षाची शिक्षा भोगावे लागणार आहे.
या प्रकरणातील दादा फुलपगारे हा संशयित आरोपी खून व खुनाचा प्रयत्न या कलमांमधून निर्दोष सुटला. मात्र अन्य कलमान्वये त्याला साडेतीन वर्षाचा कारावास भोगावा लागणार आहे. तर पुराव्याअभावी संशयित गोपाल चौधरी भैय्या बाविस्कर सनी सानप या तिघांची निर्दोष मुक्तता करण्यात आली आहे.
