महाराष्ट्र संवाद न्यूज
जुन्नर (पुणे) : खूनाचा प्रयत्न केल्याच्या गुन्ह्यात अटकेत असलेल्या आरोपीला लवकर जामीन मिळवून देण्यासाठी या प्रकरणाचा तपास करणाऱ्या पोलीस उपनिरीक्षकाला देण्यासाठी २० हजाराची लाच मागणाऱ्या वकीलावर लाच लुचपत प्रतिबंधक विभागाने शुक्रवारी (ता. २९) गुन्हा दाखल करून अटक केली आहे. शिवम गजानन नायकोडी असे लाच लुचपत विभागाने अटक केलेल्या वकिलाचे नाव आहे.
मिळालेल्या माहितीनुसार, ७० वर्षांचे ज्येष्ठ नागरिक असलेल्या तक्रारदाराच्या मुलाला जुन्नर पोलिसांनी खूनाचा प्रयत्न केल्याच्या गुन्ह्यात अटक केली होती. नायकोडी तक्रारदारांचे खासगी वकील होते. त्यांनी मुलाला लवकर जामीन मिळवून देण्यासाठी तपास अधिकारी असलेल्या पोलीस उपनिरीक्षकाला २५ हजार रुपये, स्वतःची वकील फी १० हजार रुपये द्यावे लागतील असे सांगितले.
याबाबत तक्रारदाराने लाचलुचपत प्रतिबंधक विभागाकडे तक्रार केली होती. लाचलुचपत प्रतिबंधक विभागाकडून ९ डिसेंबर रोजी तक्रारीची पडताळणी केली. मुलास लवकर जामीन मिळवून देण्यासाठी तक्रारदाराकडे २० हजार रुपये लाचेची मागणी समक्ष व फोनद्वारे पंचासमक्ष केली असल्याचे निष्पन्न झाले.
याप्रकरणी तपासी अधिकाऱ्याचा सहभाग लाचलुचपत प्रतिबंधक विभागाला आढळून आला नाही. लाच मागितल्यानंतर तक्रारदाराने लाचलुचपत प्रतिबंधक विभागाकडे तक्रार केली होती. त्याची पडताळणीही झाली होती. मात्र कारवाई दरम्यान तक्रारदाराचे १७ डिसेंबर रोजी निधन झाल्याने सापळा कारवाई होऊ शकली नाही.
मात्र लाच मागितली गेली असल्याने गुन्हा दाखल करण्यात आला आहे. ही कारवाई पुणे परिक्षेत्राचे पोलीस अधीक्षक अमोल तांबे अप्पर पोलिस अधीक्षक डॉ. शीतल जानवे यांच्या मार्गदर्शनाखाली पोलीस निरीक्षक रूपेश जाधव, पोलीस अंमलदार माने, कोमल शेटे आणि चालक पोलीस हवालदार कदम यांच्या पथकाने केली.
