महाराष्ट्र संवाद न्यूज
पुणे : पंचवीस वर्षीय तक्रारदार महिला आणि तिच्या दोन मित्रांविरोधात पोलिसात गुन्हा दाखल होऊ नये यासाठी पोलिसांबरोबर तडजोड करतो, यासाठी पाच लाख रुपये द्यावे लागतील असे सांगत तक्रारदार आणि तिच्या दोन मित्रांकडून फोन पे द्वारे पैसे स्वीकारणारा पुण्यातील वकील एसीबीच्या सापळ्यात अडकला आहे.
सुमित नामदेवराव गायकवाड (वय २५ वर्ष, रा. सेवागिरी निवास, भारती विद्यापीठ, आंबेगाव पठार, पुणे) असे गुन्हा दाखल झालेल्या वकिलाचे नाव आहे. तक्रारदार महिलेच्या व्यक्तिगत कारणावरून तिच्या दोन मित्रांना कोथरूड पोलिसांनी शास्त्रीनगर पोलीस चौकीमध्ये नेले होते. त्यानंतर तक्रारदार महिलेच्या मित्रांचे ओळखीचे वकील सुमित गायकवाड यांनी तक्रारदार आणि तिच्या मित्रांविरुद्ध गुन्हा दाखल होऊ नये यासाठी पोलिसांसोबत तडजोड करतो, असे सांगून त्यासाठी पाच लाख रुपयांची मागणी केली.
त्यानंतर वकील गायकवाड यांनी तक्रारदार महिलेकडून एक लाख रुपये व तक्रारदार महिलेच्या मित्रांकडून फोन पे द्वारे पन्नास हजार आणि पाच हजार असे एक लाख पंचावन्न हजार रुपये घेतले होते. त्यानंतर उर्वरित रक्कम देत नाही तोपर्यंत तक्रारदार महिलेविरुद्ध असलेला पुरावा नष्ट करणार नसल्याचे सांगत वकिलाने उर्वरित तीन लाख पन्नास हजार रुपयांची मागणी केली होती.
त्यामुळे तक्रारदार महिलेने लाच लुचपत प्रतिबंधक विभागाच्या पुणे विभागाशी संपर्क करत तक्रार नोंदविली. लाच लुचपत प्रतिबंधक विभागाने तक्रारीची पडताळणी केली असता गायकवाड याने तक्रारदार महिलेकडे त्यांच्या मित्राला कोथरुड पोलीसांकडून सोडविण्यासाठी तसेच तकारदार हिच्यावर पोलिसांकडून गुन्हा दाखल न करण्यासाठी साडेतीन लाख रुपये पंचासमक्ष लाच मागणी करुन, त्यापैकी वीस रुपये फोन पे द्वारे त्यांचे अकाऊंटमधे मागणी करुन पोलीस लोकसेवकाकरीता लाच स्विकारली.
लाच लुचपत प्रतिबंधक विभागाच्या अधिकाऱ्यांनी कोथरूडच्या पौड रोडवरील वनाझ कॉर्नर जवळ सापळा रचत बुधवारी आरोपीवर कारवाई केली. आरोपी वकील गायकवाड याच्या विरोधात पुण्याच्या कोथरुड पोलीस ठाण्यामध्ये भ्रष्टाचार प्रतिबंधक अधिनियम कलम ७(अ ) नुसार दाखल केला आहे.
